Talada la siinaayo qofka covid-19 qaba

Waxa muhiim ah in wax badan la cabo, gaar ahaan haddii aad xumad ama qufac leedahay. Waxa wanaagsanaan karta in waxoogaa biyo kulul ama biyo qabow aad cabto haddii uu cunahu ku xanuunaayo.

Cab tusaale ahaan biyo, shaah, maraq la fadhiisiyey ama maraq caadi ah.

Waxaad sidoo kale cuni kartaa jalaato, iskiriin ama caano fadhi.

Waxa wanaagsan inaad madaxa kor u soo qaado.

Waxay taasi kaa caawineysaa haddii aad wax badan qufacayso.

Madaxa barkin dheeraad ah hoos dhig markaad hurudo.

Waxa fiicnaan karta in markaad seexaneyso qolku waxoogaa yara qaboobaado.

Waxaad tusaale ahaan naaqusi kartaa kuleyliyaha (hiiterka) ama daaqadda ayaad furi kartaa.

Waxaad u baahan tahay inaad nasato markaad jiran tahay. Laakiin ma fiicna wakhti badan in aanad dhaqdhaqaaqin/aad iska jiifto.

Waxa ka sii fiican haddii aad isku daydo inaad dhaqdhaqaaq samayso.

Kuwani waa waxyaabo aad tusaale ahaan isku dayi karto inaad sameyso:

• Lugaha iyo cagaha dhaqdhaqaaji.
• Mararka qaarkood dhinaca aad u jiifto bedel.
• Mararka qaarkood fadhiiso ama kor u istaag.

Markaad roonaato ayaad isku dayi kartaa inaad banaanka aado/u baxdo oo aad dhaqdhaqaaq sameyso. Ha sameynin wax ka badan waxaad awoodi karto.

Waxaad isticmaali kartaa dawo paracetamol ku jirto haddii qandho/xumad badan aad leedahay. Dawadu waa mid aan warqadda dhakhtarku kuu qoro u baahneyn.

Carruurta lix bilood ka weyn ayaa dawada paracetamol ku jirto isticmaali karta. Haddii ilmahu uu lix bilood ka yar yahay ayaad marka hore dhakhtarka waydiinaysaa.

Qofka uu cunahu xanuunaayo ayaa kiniinka cunaha isticmaali kara.

Waxaad isticmaali kartaa dhibcaha sanka ama dawada sanka la iskaga buufiyo. Waxa jirta dawada dhibcaha sanka ama dawada sanka la iskaga buufiyo oo aan warqadda dhakhtarka u baahneyn oo ay cusbo ku jirto.

Waxa sidoo kale jirta dawada dhibcaha sanka ama dawada sanka la iskaga buufiyo oo aan warqadda dhakhtarka u baahneyn taas oo bararka sanka yaraysa. Dawada dhibcaha sanka ama dawada sanka la iskaga buufiyo waxaad ugu badnaan isticmaalaysaa toban maalmood.

Iskuday inaanad sigaar cabbin iyo inaanad joogin halka ay dadka kale sigaar ku cabayaan. Qufaca waxa uu kaaga sii darayaa qiiqa.

Cidla ayaa la dareemi karaa in guriga la joogo. Dad badan ayaa u arka inay wax adag tahay inaan lala kulmin dadkaad badanaa la kulmi jirtay.

Isku day inaad xidhiidh la samayso saaxiibadaa iyo qoyskaaga tusaale ahaa waad isa soo wici kartan.

Waxa wanaagsan in sida caadiga ah wakhti isla mid ah wax la sameeyo. Waxaad tusaale ahaan kici kartaa oo aad quraacaan kartaa isla xilligaad sidaas sameyn jirtey.

Wac lambarka 1177 haddii aad rabto in lagaa caawiyo waxaad sameynayso/sidaad yeeli lahayd. Cidda ka jawaabeysaa waa kalkaalisooyin. Waxay sidoo kale adiga kaa caawin karaan halka aad daryeel ka raadsaneyso, haddii aad ka sii xanuunsato.

Waxay kalkaalisadu ku hadashaa af Iswidhish iyo Ingiriisi.

Wac +46 771-11 77 00 haddii aad telefoon lambar wadanka dibadiisa ah kasoo hadlayso.

Wac telefoonka 08-123 680 00 haddii su'aalo covid-19 ku saabsan aad qabtid oo la hadal qof af Soomaali ku hadla . Khadka taleefanku waxa uu furan yahay Isniinta ilaa Jimcaha 9.00 -15.00.