Sinua kehotethaan othaan vaksinasjuunin jos joku näistä asioista soppii sulle:

• Sie täytät 65 vuotta tänä vuona eli olet vanheempi.
• Sie olet raskhaana ja olet ollu sitä 12 viikkoa.
• Sulla on sairhaus eli jotaki muuta joka lissää vaaraa tulla vakavasti sairhaaks. Se koskee kaikkia jokka on kun kuus kuukautta eli vanheemat.
• Sie asut jonku kans jolla on vahvasti heijompi imyynisuoja.

Mitä saattaa vaikuttaa ette mulla on suurempi riski tulla vakavasti sairhaaksi?

Tämä lissää riskiä ette sie tulet vakavasti sairhaaks inflyensasta:

• Sulla on syän-verisuoni sairhaus, tähhään kuuluu stroukki.
• Sulla on keuhkosairhaus, esimerkiks vakava astma.
• Sulla on diabeettes.
• Sulla on vahvasti heijompi imyynisuoja jonku sairhauven eli käsittelyn takia.
• Sulla on maksan eli munuaisen vajaatoiminta.
• Sulla on vahva liikapaino.
• Sulla on neyromyskylääri sairhaus joka vaikutta hengityksheen.
• Sulla on monta toiminanestheitä
• Sulla on Downsin syntroomi

Kehotukset koskevat sekä sinua joka olet raavas, ja lapsia jokka on vanheemat kun kuus kuukautta.

Sinua, jolla on korkeampi riski tulla vakavasti sairhaaks jostaki syystä, saatethaan kans kehottaa ottaa vaksinasjuunin. Se on sinun lääkäri joka arvostellee sen.

Jos sie asut jonku kans joka saattaa tulla vakavasti sairhaaks sinua kehotethaan othaan vaksinasjuunin inflyensaa vasthaan sen takia ette suojata heitä. Se jällaa kans sinua joka olet jonku lähelä töissä joka saattaa tulla vakavasti sairhaaks.

Sie tarttet ottaa vaksinasjuunin joka vuosi

Kun sie olet vaksineeranu itteästi sie olet suojattu inflyensaviirystä vasthaan joka on tänä vuonna. Sie tarttet ottaa vaksinasjuunin joka vuosi ette pittää suojan viirystä vasthaan.

Vaksinasjuuni pneumokockeria vasthaan

On kans olemassa muu vaksiini, jota sie piät ottaa jos sie olet henkilö ketä kehotethaan ottaa vaksinasjuunin inflyensa vasthaan.

Se on vaksiini niin sanottu pneumokockeria vasthaan. Pneumokockerit on erikoiset bakteeriet jokka tekevät ette sie tulet hyvin sairhaaks keuhkokuumheen.

Jos sie olet raskhaana sillon sie et tartte vaksineerata pneumokockeria vasthaan.

Sie otat vaksinasjuunin sinun terhveyskeskuksessa eli siukkatuvassa. Jos sie asut Skellefteåssa sie saat mielelhään ottaa vaksinasjuunin keskeisessä vaksinasjuunikeskustassa Vaccinationscentrum Skellefteå.

Jos sie olet vanheempi henkilö ja asut sellaisessa paikassa missä on henkilökuntaa vuorokauven ympäri sillon sie saat vaksinasjuunin paikan päälä. Sitä kuttuthaan ”särskilt boende” ruottiks.

Sie saat pruutan kautta inflyensavaksiinin. Pruuta pruukathaan antaa käenvarren yläpuolele. Lapset nuoremat kun 3 vuotta saavat usseimiten vaksiinin jalan reitheen. Lapsile yli 2 vuotta ja nuorile aina 18 vuen ikhään on kans olemassa vaksiini nokkasprein muoossa.

Missä sie sait pruutan sie saatat tulla vähän punaseks ja saa vähän paisumaa jälkhiin. Se saattaa kans tuntua vähän aralta. Sie saatat saa feeberiä, päänsärkyä ja kipeää lihaksissa. Lapset saattavat saa kehnoman ruokahalun ja diarreen. Vaivat pruukaavat mennä yli muutamassa päivässä.

Jos sulla on feeberi sie et piä ottaa vaksinasjuunia.

Sie joka olet raskhaana saatat tulla erittäin sairhaaks inflyenshaan. Sinua kehotethaan othaan vaksinasjuunin ette suojata sinua ja lasta.

Se ei ole vaaralista sinun lapsele joka on vattassa. Vaksiini antaa kans vastasyntynheele lapsele hyvän suojan.

Sie saatat ottaa vaksinasjuunin vaikka sie imetät. Sinua kehotethaan ottaa vaksinasjuunin kun sie olet ollu raskhaana vähhiinthään 12 viikkoa. Sinua saatethaan kehottaa othaan vaksinasjuunin aiemin jos sinun lääkäri arvostellee ette sie tarttet sen.

Västerbottenissa vaksinasjuuni on ilmhainen sulle joka saatat tulla vakavasti sairhaaks.

Jos sie asut jonku kans joka saattaa tulla vakavasti sairhaaks eli jos sie et ole henkilö jota kehotethaan vaksinasjuunin mutta silti haluat saa vaksineerata itteästi, sillon se maksaa 350 kruunua.

Jos sie tulet inflyensa sairhaaks vaikka sie olet ottanu vaksinasjuunin sillon symtoomit tulevat usseimiten lievemäks.

Pysy kotona niin pitkhään kun sulla on feeberi ja tunnet ette olet sairas. Ryi ja aivasta kainalhoon ja pese käet useasti ettet tartuta muita.

Sie piät kontaktata hoitoa ja saa neuvoja jos sie saat inflyensan ja sie olet henkilö jota kehotethaan othaan vaksinasjuunin.

Se on tärkeä ette sie ymmärät mitä hoitohenkilökunta bertoo. Kysy jos sie et ymmärä. Sie saatat saa apua tulkilta jos sie et puhu ruottia. Sano ette sie tarttet tulkin joka ossaa sinun kieltä kun sie varraat sinun vierailun.

Sie saatat kans saa apua tulkkauksen kans jos sulla on toiminaneste.

Sinua jota kehotethaan othaan vaksinasjuunin inflyensaa vasthaan kehotethaan kans othaan vaksinasjuunin covid-19 vasthaan. Sen sie saatat tehhä samala kerrala.

Sie saatat saa covid-19 vaikka olet saanu vaksinasjuunin. Mutta vaksinasjuuni vähentää riskiä tulla vakavasti sairhaaks.