መርመራታት ጥዕና ናይ ሓድሽ ዝተወልደ ህጻን

እቲ ቈልዓ ድሕሪ ምውላዱ ሽዑንሽዑ ብዙሕ ግዜ ክምርመር እዩ።

እተን ሰራሕተኛታት ካልእ ገዲፍካ ልቢ ከመይ ትሃርም ከም ዘላን እቲ ቆልዓ ከመይ የስተንፍስ ከም ዘሎን ክሰምዓ እየን።

ምስ ዘድሊ እቲ ቈልዓ ሕክምና ክግበረሉ እዩ።

ኣብዚ ግዜ እዚ መብዛሕት ግዜ ሓደ ወላዲ ነቲ ቈልዓ ክሕዞ ይኽእል እዩ። ሓደ ሓደ ግዜ እቲ ቈልዓ ኣብ ሓደ ፍሉይ ጣውላ ኮይኑ ይምርመር።

ሓንቲ መሕረሲት እቲ ቈልዓ ምስ ተወልደ ድሕሪ ሒደት ሰዓታት ክትምርምሮ እያ። እቲ መርመራ ነዞም ዝስዕቡ ዘጠቓለለ ክኸውን እዩ፦

• እቲ ቈልዓ ይምዘንን ይዕቀንን።
• ሙቐት ኣካላት ናይ’ቲ ቈልዓ ይዕቀን።
• ሓደ ኣብ ደም ዝርከብ ፍሉይ ነገር ክዕቀን እዩ። እታ መሕረሲት ነዚ ሓደ መዓቀኒ ኣብ ቈርበቱ ተጠቂማ ትገብሮ። ሓደ ሓደ ግዜ መርመራ ደም የድሊ እዩ። እቲ መጠን ልዑል ኮይኑ ምስ ዝጸንሕ እቲ ቈልዓ ሕክምና ከድልዮ ይኽእል እዩ።
• እቲ ቈልዓ ኣብ ሰለፉ ቪታሚን-ኮ ክውጋእ እዩ።

ሓደ ሓደ ግዜ ሽኮር ደም ይዕቀን እዩ። መብዛሕትኡ ግዜ ብመርፍእ ካብ እግሪ ናይ’ቲ ቈልዓ ይውሰድ።

ኩሎም ቈልዑ ቅድሚ ናብ ቤቶም ምኻዶም ብሓኪም ቈልዑ ይምርመሩ እዮም። እቲ መርመራ ሓጺር ግዜ እዩ ዝወስድ።

እቲ ሓኪም ቈልዑ ነዚ ዝስዕብ ክርእን ክሰምዕን እዩ፦

• ልቢ
• ሳምቡእን ምስትንፋስን
• ከብዲ
• የዕንቲ
• ርእሲ
• ጾታዊ ብልዕትን ባጡቕን
• ቈርበት።

ኣብ ቤትኪ ምስ ትሓርሲ

ድሕሪ ሕርሲ ብዝተኻእለ መጠን ቀልጢፉ ሓደ ሓኪም ቈልዑ ነቲ ቈልዓ ክምርምሮ ኣለዎ።

ናይ ቆጸራ ግዜ ንምውጣን ቅድሚ ሕርስኺ ምስ መሕረሲት ተዛረቢ።

ድሕሪ ክልተ መዓልቲ ሓደ መርመራ ፐኮኡ ዝብሃል ናይ ደም መርመራ ክውሰድ እዩ። እቲ መርመራ ካብ ኢድ ወይ እግሪ እቲ ቈልዓ ዝርከብ ሰራውር ደም እዩ ዝውሰድ።

እቲ መርመራ እቲ ቈልዓ ዝኾነ ልሙድ ዘይኮነ ሕማም ከይህልዎ ንምርማር እዩ ዝውሰድ።

ምእንቲ እቲ ቈልዓ ክሃድእን ዝወሓደ ቃንዛ ክገብረሉን፡ ቅድሚ እቲ መርመራ ምውሳዱ፡ ቁሩብ ኣቐዲምኪ ምጥባዉ ጽቡቕ እዩ። ሓደ ሓደ ግዜ መርመራ ኣብ ዝውሰደሉ እዋን ነቲ ቈልዓ ኣብ ኣፉ ማይ ሽኮር ክወሃቦ ይኽእል እዩ።

መሕረሲት ናይ’ቲ ቈልዓ ናይ ምስማዕ ዓቕሚ ክትምርምሮ እያ። እቲ መርመራ መብዛሕት ግዜ እቲ ቈልዓ ምስ ደቀሰ እዩ ዝግበር።

ዳህሳስ መጠን ኦክስጂን ኣብ ደም ኣብ ዝግበረሉ እዋን ሓንቲ መሳርሒት ኣብ ኢድ ወይ እግሪ ናይ’ቲ ቈልዓ ትተሓሓዝ። እዛ መሳርሒት ብመቓቐር ወይ ባዕሉ ዝጣበቕ ቴፕ ትተሓዝ።

እዚ መርመራ መፈጠራዊ  ናይ ልቢ ጸገም ከይህልዎ ንምፍላጥ እዩ ዝግበር።

ቅልጡፍን ዘየቐንዙን እዩ።

ሰራሕተኛታት ናይ’ቲ ሆስፒታል ቅድሚ ንቤትኩም ምኻድኩም እቲ ቈልዓ ሸይኑን ቀልቀል ወጺኡን እንተ ኾይኑ ክምርምራ እየን።

ናይ’ቲ ቈልዓ ሽንትን ቀልቀልን ኣብታ ቀዳመይቲ ሰሙን ከመይ ገይሩ ሕብሪ ከም ዝቕይር ኣብዚ ስእልታት ክትርእዪ ትኽእሊ ኢኺ። እቲ ጽሑፍ ብሽወደንኛ እዩ።

ካብ ሆስፒታል ናብ ቤትኩም ምስ ተመለስኩም፡ ቀዳማይ ርክብ ምስ ማእከል ክንክን ጥዕና ቈልዑ (BVC) ክትገብሩ ኢኹም። ሽዑ ሓንቲ ኣብ ማእከል ክንክን ጥዕና ቈልዑ ትሰርሕ ኣላዪት ሕሙማት ናይ ገዛ ምብጻሕ ክትገብር ክትመጻኩም እያ።

ሽወደንኛ ዘይትዛረቢ ምስ እትኾኒ ካብ ሓደ ኣስተርጓሚ ሓገዝ ክትረኽቢ መሰል ክህልወኪ ይኽእል እዩ።