ምቅልጣፍ ሕርሲ

ሕርሲ ብብዙሕ ምኽንያታት ከም ዝብገስ ክግበር ይከኣል እዩ። እቲ ብዝያዳ ዝውቱር ምኽንያት እቲ ጥንሲ 41 ሰሙን ስለ ዘሕለፈ እዩ። ካልእ ምኽንያት ንስኺ ነፍሰ-ጾር ከም ምረዛ ጥንሲ (havandeskapsförgiftning) ዝኣመሰለ ሕማም ስለ ዘለኪ ክኸውን ይኽእል እዩ። 

ቅድሚ እቲ ምብጋስ ሕርሲ ምጅማሩ ምስ ሓደ ሓኪም ክትዘራረቢ ኢኺ። እቲ ሕርሲ ብኸመይ ክግበር ምዃኑ ሓበሬታ ክወሃበኪ እዩ። ሕቶታት ምስ ዝህልወኪ ድማ ክትሓቲ ትኽእሊ ኢኺ። 

ኣብ ክፍሊ መወልዳን መጀመርታ ምስ ሓንቲ መሕረሲት ክትራኸቢ ኢኺ።  

እታ መሕረሲት እቲ ኣብ ከብድኺ ዘሎ ህጻን ጥዕንኡ ከመይ ከም ዘሎ ክትምርምሮ እያ። 

እታ መሕረሲ ወይ ሓኪም ክምርምሩኽን ኣፍ ማህጸን ከመይ ከም ዘሎ ክድህስስዎን እዮም። ኣፍ-ማህጸን፡ እቲ ናብ ርሕሚ ገጹ ዝወርድ ታሕተዋይ ክፋል ማህጸን እዩ። ቅድሚ መበገሲ ሕርሲ ምውሃብ ክልስልስን ክኽፈትን ኣለዎ። 

ድሕሪኡ እቲ መበገሲ ሕርሲ ይወሃብ። 

ሕርሲ ንምብጋስ ትጥቀመሉ ብዙሕ ሜላታት ኣሎ 

ንኣብነት መድሃኒት ክትወሃቢ ትኽእሊ ኢኺ። ካልእ ሜላ ሓንቲ መሕረሲት ነቲ ሽፋናት ማንታ ርእሲ ብምንኳል ክኸውን ይኽእል እዩ። ሽዑ ማንታ ርእሲ ይፈስስ።  

እቶም ዝተፈላለዩ ሜላታት ንሕማም ሕርሲ ከም ዝጅምር ይገብርዎ። ኣፍ-ማህጸን ክልስልስን ክኽፈትን ኣለዎ። ሽዑ እቲ ህጻን ናብ ጎሎ ይወርድ። 

ሓደ ሕርሲ ንምብጋስ ዝወስዶ ግዜ ይፈላለ እዩ። ሓደ ሓደ ግዜ እቲ ሓቀኛ ሕርሲ ቅድሚ ምጅማሩ ካብ ክልተ ክሳብ ሰለስተ መዓልታት ክዱንጕ ይኽእል እዩ። ኣብ ውሽጢ እዚ ግዜ እዚ መብዛሕትአን ነፍሰ ጾራት ኣብ ሆስፒታል ምጽናሕ የድለየን እዩ። 

እቲ ሕርሲ ምስ ጀመረ መብዛሕትኡ ግዜ እቲ ሕጻን ኣብ ውሽጢ ሓደ መዓልቲ ይውለድ። እቲ  ሕርሲ፡ ልክዕ ከም መበገሲ ዘይወሰዳ፡ ማለት ከም ናይ ንቡር ሕርሲ ደረጃታት እዩ ዝኽተል። 

እቲ ሕርሲ መበገሲ ዝለ ዝተገብረሉ ጥራይ ካብቲ ልሙድ ንላዕሊ ጽንኩር ክኸውን ኣየድልዮን እዩ። ይዅን’ምበር መብዛሕትኡ ግዜ ዝነውሓ ግዜ እዩ ዝወስድ። 

መስሓቢ (ሱግክሎካ sugklocka) ወይ መጥባሕታዊ ሕርሲ ከድሊ ኣዚዩ ዝውቱር እዩ 

እቲ ሕርሲ ኣብ ርእሲ እቲ ህጻን ብዝገጥም መሳርሒ ክውዳእ ኣዚዩ ዝውቱር እዩ። እዚመሳርሒ  መስሓቢ (ሱግክሎካ) ይበሃል። ኣብ ከምዚ ኵነት ሓደ ሓኪም ተጠንቂቝ ነቲ ህጻን ብምስሓብ ይሕግዝ።  

ከምኡ’ውን እቲ ሕርሲ ብመጥባሕታዊ ሕርሲ ክውዳእ ከድልዮ ኣዚዩ ዝውቱር እዩ። ምኽንያት ናይዚ መብዛሕትኡ ግዜ እቲ ሕማም ሕርሲ ከም ዝድለ ሓያል ብዘይምንባሩ እዩ።  

ቅድሚ ሕርስን ድሕሪ ሕርስን ሓሳባትን ሕቶታትን ክህልወኪ ይኽእል እዩ። 

ሓገዝ ንምርካብ ምስ ሓንቲ መሕረሲት ተዛረቢ። 

ሽወደንኛ ዘይትዛረቢ እንተ ዄንኪ መሰል ናይ ኣስተርጓሚ ክህልወኪ ይኽእል እዩ።