ኣካላዊ ምውስዋስን ምንቅስቓስን ድሕሪ ጥንሲ

እቲ ቈልዓ ካብ ማህጸን ምስ ወጸ፡ ኣካልት ሽዑንሽዑ ናብ ንቡር ክምለስን ክሓውን ይጅምር።  
 
ብርሕሚ እንተ ዄንኪ ሓሪስኪ ብልዕትኺ ምሕዋይ የድልዮ እዩ። ብመጥባሕቲ እንተ ዄንኪ ሓሪስኪ ከብድኺ ምሕዋይ የድልዮ እዩ። 
 
ምሕዋይ መብዛሕትኡ ግዜ ካብ 6 ክሳብ 8 ሰሙን ይወስድ። ድሕሪኡ ኣካላትኪ ምሉእ ብምሉእ ናብ ንቡር ንኽምለስ ክሳብ ሓደ ዓመት ክወስድ ይኽእል እዩ። ኣብዚ ግዜ እዚ ምውስዋስ ኣካላትን ምንቅስቓስን ጽቡቕ እዩ።

ኣብተን መጀመርታ መዓልታት ድሕሪ ሕርሲ ቁሩብ ክትንቀሳቐሲ ጽቡቕ እዩ። ንኣብነት ኣቀማምጣ ክትቀያይሪን ኣብ መንጎ ኮፍ ምባል፡ ደው ምባልን ወይ ምኻድን ክትቀያይሪ ትኽእሊ ኢኺ። 
 
ድሕሪ ቁሩብ መዓልታት ቁሩብ ዝያዳ ክትንቀሳቐሲ ክትጅምሪ ትኽእሊ ኢኺ። ምናልባት ብእግሪ ክትዛወሪ ትኽእሊ ኢኺ።

ነቶም  ኣብ ታሕተዋይ ክፍላ ጎሎ፡ ማለት ኣብ ብልዕቲ ዘለዉ ጭዋዳታት እውን ብልምምድ ከተትርርዮም ትኽእሊ ኢኺ። ነዚ ብቐጥታ ድሕሪ ሕርሲ ክትጅምርዮ ትኽእሊ ኢኺ። ነቶም ጭዋዳታት ጨቢጥክን ወጢርክን ሓዝዮም። ኣፍኹስኪ ጀምሪ። ድሕሪ ኣስታት ሰለስተ ኣርባዕተ ሰሙን ከተሓይልዮ ትኽእሊ ኢኺ። ኣብ መንጎ እና ተዛነኺ ንሓጺር ግዜ ጥራይ ወጢርኪ ሓዝዮ።

ድሕሪ ካብ 6 ክሳብ 8 ሰሙን ምውስዋስ ኣካላት ክትገብሪ ክትጅምሪ ትኽእሊ ኢኺ።  

ጀማሪት እንተ ዄንኪ ክብደት ከይተጠቀምኪ ጀምሪ። ክብደት ኣካላትኪ ጥራይ ተጠቀሚ። ጽቡቕ ክስምዓኪ ምስ ጀመረ ትጥቀምሉ ክብደት ክትውስኺ ትኽእሊ ኢኺ።  
 
ኣብዛ ፊልም፡ ኣብ ሰሙን ብዙሕ ግዜ ክትገብርዮ እትኽእሊ ሓሙሽተ ልምምዳት ትርእዪ።  
 
እዞም ዝስዕቡ ልምምዳት ኣብዛ ፊልም ኣለዉ፦ 

• ሰድያ ብምጥቃም ብርክኺ ምዕጻፍ። 
• ኣእዳውኪ ናብ መንደቕ ምጽቓጥ። 
• በጥ ኢልኪ ጎሎ ሓፍ ምባል። 
• በጥ ኢልኪ ብርኪ ሓፍ ምባል። 
• ብጎቦ በጥ ኢልኪ ምሕኩልቲ ሓፍ ምባል። 
   

እዞም ልምምዳት ብልምምድ ተራር ኵኒ ኣይትዅኒ ብዝየገድስ ንዅሉ ዝሰማምዑ እዮም። ነቶም ንዓኺ ዝሰማምዑ ምረጺ።

ድሕሪ ጥንስን ሕርስን ምውስዋስ ኣካላት ጽቡቕ ምዃኑ ክገብርዎ ዝኽእሉ ብዙሓት ምኽንያታት ኣለዉ። 
 
ምውስዋስ ኣካላት ምስ እትገብሪ ክመሓየሹ ናይ ዝኽእሉ ሓደ ሓደ ኣብነታት እንሆ፦ 

• ድሕሪ ሕርሲ ቀልጢፍኪ ትሓውዪ። 
• ብዝያዳ ንቕሕቲ ትኾኒ።  
• ዝሓሸ ድቃስ ትድቅሲ። 
• ዝወሓደ ጸገማት ናይ ከብዲ ይህልወኪ።  
• ዝወሓደ ናይ ጭንቀትን ቃዝኖትን ጸገም ክህልወኪ ይኽእል። 
• ቃንዛ ሕቖ ክውሕደልኪ ይኽእል። 
• ዝደልደለ ኣካላት ትረኽብን ዝያዳ ሓይሊ ክህልወክን ይኽእል።