Waa caadi in la bilaabo inaad hesho caadadaada waqti u dhexeeya da’da sagaal iyo lix iyo toban. Caadada waxay kaa joogsataa marka aad gaartid dhalmo-dayn, oo qiyaastii da’da konton. 

Waa caadi ah in caadada ay socoto saddex ilaa lix maalmood iyo inaad dhiig-baxdo  qiyaastii 50 ml oo dhiig ah (qiyaastii 3 qaaddo cuntada) inta lagu jiro muddada oo dhan. Caadadaada waxay ku dhici kartaa waqti kala duwan wareeg kasta, ama qiyaastii isla waqtiga bil walba. Way u kala duwan tahay dadka kala duwan.

Ugxan-sidaha waxay leeyihiin ukumo badan. Bil walba, ukumo ayaa soo baxda oo waxay ku sii daysaa  tuubooyinka ilmo-galeenka. Tan waxaa loo yaqaan ugxansiddo. Isla markaana, xuubka ilmo-galeenka ayaa ballaadhaa si uu isugu diyaariyo inuu qaabilo ukunta bacriman. Ukunta waxay ku bacrimi kartaa shahwada. Taasi waa sida uurku ku dhaco.

Haddii ukunta aysan bacrimin, xuubka ilmo-galeenka looma baahna. Xaaladdaas, jirka wuxuu daadiyaa xuubka ilmo-galeenka oo ay wehliyaan dhiig. Taasi waa waxa caadada tahay. Kadib caadada, wax walba dib ayay u bilaabmaan.

Dadka qaar ayaa dareemi kara murugo, caro ama welwel dhawr maalmood ah caadadooda ka hor. Dadka qaar waxay dareemaan barar caloosha ama naasaha. Tan waxaa loo yaqaan PMS. Waad heli kartaa caawimaad haddii ay wax badan ku saameyso.

Dadka qaar wuxuu ku dhici karaa xanuunka caloosha ama dhabarka markii ay qabaan caadadooda. Waxaad isku dayi kartaa xanuun baabi’iye dukaanka oo aad ka iibsan karto dukaamada waaweyn ama farmashiyaha.

Haddii kuwaan ay kugu khuseeyaan, aad ayaad u dhiig-baxeysaa:

• Waxaad qabtaa caadadaada in ka badan toddoba maalmood.
• Dhiiggu wuxuu wataa xinjiro.
• Dhiiggu wuxuu ka soo dhex baxaa waxyaabaha aad caadada u xirato.
• Waxaad baddeshaa waxyaabaha aad caadada u xirato marar badan.

Looma baahna inaad yeelato caadadaada haddii ay kuu keento caafimaad-darro. Waxaa jira ka-hortagyo uur oo joojin kara caadada. Tani ma aha khatar. La hadal umulisada ama dhakhtar haddii aad rabto macluumaad dheeraad ah.

Waad heli kartaa caawimaad  haddii aad qabtid dhibaatooyinka caadada. Tusaale ahaan:

• Wax badan ayaad dhiig-baxdaa.
• Maysan kugu dhicin caadadaada lix bilood ama ka badan, oo waad ogtahay inaadan uur laheyn ama aysan caadada joogsan.
• Aad u murugeysantahay, careysantahay ama aad welwelsan tahay caadadaada ka hor.
• Aad qabtid xanuun badan ama aysan ku caawin xanuun baabi’iye joogto ah.

Markaas la soo xiriir mid ka mid ah xarumahan:

• Rugta caafimaadka haweenka (gynekologisk mottagning). 
• Xarunta daryeelka caafimaadka (vårdcentral).

Caadi ayey tahay inaad galmo sameyso inta lagu jiro caadadaada haddii adiga iyo lammaanahaaga aad rabtaan.

Waa suurtagal in uur la qaado adigoo caado qaba. Sidaa darteed, mar walba isticmaal kondhom ama ka hortaga uurka haddii aadan rabin inaad uur yeelato.

Waxaa jira noocyo kala duwan oo alaabaha caadada ah. Waxaa jira cabbirro kala duwan oo xafaayadaha caadada iyo suufka. Dooro cabbirka aad u baahantahay iyadoo ku xiran inta aad dhiig-baxdo. Noocyada ugu muhiimsan ee alaabaha caadada waa:

• faashada dhiiga
• xafaayado caado
• suufyo
• koobabka caadada
• kastuumada caadada.

Waxaad ka iibsan kartaa faashada dhiiga, xafaayado caado iyo suufyo dukaamada waaweyn ama farmashiyaha.

Waxaad u jimicsan kartaa si caadi ah markaad qabto caadada. Waxaad aadi kartaa dabaasha adigoo isticmaalaya suuf ama koobka caadada.