ቆጸራ ናይ ምብጻሕ ብኸመይ ከም ዝተሓዝ ይፈላለ እዩ። ኣብ ገሊኡ ዞባታት እታ መሕረሲት ቆጸራ ንምሓዝ ክትድውለልኪ እያ። ኣብ ካልኦት ዞባታት ድማ ባዕልኺ ደዊልኪ ቆጸራ ክትሕዚ ኣለኪ።

እቲ ምብጻሕ ድሕሪ ሕርሲ ኣብ ውሽጢ 16 ሰሙን ይፍጸም። ምዓስ ክትመጺ ከም ዝጥዕመኪ ባዕልኺ ኢኺ እትውስኒ። እንተ ደሊኺ ድሕሪ ሓደ ሰሙን ወይ ሒደት ሰሙናት ክትመጺ ትኽእሊ ኢኺ።

ሓንሳብ ወይ ክልተ ምብጻሕ ክትገብሪ ትኽእሊ ኢኺ። እንተ ደሊኺ ብዙሕ ምብጻሕ እውን ክትገብሪ ትኽእሊ ኢኺ።

ነታ ነፍሰ ጾር ከለኺ ትረኽብያ ዝነበርኪ መሕረሲት ድሕሪ ሕርስኺ እውን ክትረኽብያ ልሙድ እዩ። እንተ ደሊኺ ግን ምስ ካልእ መሕረሲት እውን ክትራኸቢ ትኽእሊ ኢኺ።

ብዛዕባ ትሓስብዮ ክትሓቲ ትኽእሊ ኢኺ።

ካብ ብዙሕ ሒደት፡ ብዛዕባ እዚ ዝስዕብ ክትዛረባ ኢኽን፦

• ኣካላውን ስነ-ኣእምሮኣውን ጥዕናኺ ከመይ ከም ዘለኺ።
• ብዛዕባ ሕርስኽን ከመይ ምንባሩን ዘለኪ ርእይቶ። ብዛዕባ ኣብ እዋን ሕርስኺ ኣብ መዝገብኪ ዝተጻሕፈ ከተንብባ ኢኽን። ኣብኡ ኣየናይ ዓይነት ሕክምና ከም ዝተዋህበክን ብኸመይ ነቲ ቈልዓ ከም ዝወለድክዮን ሰፊሩ ኣሎ።
• ምጥባው ከምኡ’ውን ምምጋብ ናይቲ ቈልዓ።
• ብዛዕባ ወላዲት ምዃን ዘለኪ ርእይቶ።
• ቅድሚ ሕጂ ቈልዑ ምስ ዝህልዉኺ፡ ብዙሓት ቈልዑ ምህላው ከመይ ምዃኑ።
• ጾታዊ ርክብን መከላኸሊ ጥንስን።
• ዝምድናታት።

ዝተፈላለዩ ምዕቃናትን ምምዛናትን

ኣብቲ ምብጻሕ መብዛሕትኡ ግዜ እታ መሕረሲት ጸቕጢ ደምኪ ትዕቅንን ናይ ደም መርመራ ትወስድን እያ። ከምኡ’ውን ክብደትኪ ክትምዘኒ ኢኺ።

ኣብ ውሽጢ ርሕምን ከባቢኡን ዝግበር መርመራ

እታ መሕረሲት ኣብ ውሽጢ ርሕምኽን ከባቢኡን ክትምርምረኪ እያ። ነእጋርኪ መደግፊ ኣብ ዘለዎ መንበር ብሕቘኺ በጥ ክትብሊ ኢኺ። ኣእጋርኪ ክፈናተትን ታሕተዋይ ክፋል ኣካላትኪ ጥራሕኪ ክትኮንን ኢኺ።

እታ መሕረሲት ንኣብነት ነዚ ዝስዕብ ክትምርምር እያ፦

• ድሕሪ ሕርሲ ኣብ ርሕምኺ ምትርባዓት እንተ ኣለኪ ኰይኑ።
• ኣብ ውሽጢ ርሕምን ከባቢኡን ከምኡ’ውን ኣብ መሃንቱስ ዘለዉ ጭዋዳታት ከመይ ይሰርሑ ከም ዘለዉ።

ብመጥባሕቲ ምስ ትሓርሲ

እታ መሕረሲት ብምርኣይን ምድህሳስን ነቲ ቁስሊ ትምርምሮ።

ምስ ዘድልየኪ፡ እታ መሕረሲት ምስ ሓኪም ንኽትራከቢ ክትሕግዘኪ እያ።

ሓደ ሓደ ግዜ ካብ ካልእ ወሃብ ሕክምና ክንክን ምርካብ ከድልየኪ ይኽእል እዩ። እዚ ንኣብነት ሓደ ፊዝዮተራፐኛ (ክኢላ ስነ-ምንቅስቓስ) ወይ ሓደ ክኢላ ስነ-ኣእምሮ ክኸውን ይኽእል እዩ።

እታ መሕረሲት ናይ ምብጻሕ ቆጸራ ንኽግበረልኪ ክትሕግዘኪ እያ።

ሽወደንኛ ዘይትዛረቢ እንተ ዂንኪ ኣብቲ ናብ ኣገልግሎት ሕክምና ትገብርዮ ምብጻሓት ካብ ሓደ ኣስተርጓሚ ሓገዝ ክትረኽቢ ትኽእሊ ኢኺ። ቆጸራ ናይ ምብጻሕ ክትሕዚ ከለኺ ናይ ቋንቋ ኣስተርጓሚ ከም ዘድልየኪ ሓብሪ።