ጥንሲ

ነፍሰ ጾር ኣብ እትህልውሉ እዋን ኣካላትኪ ብዝተፈላለየ መንገዲ ይጽሎ እዩ። እዚ ዝተፈላለየ ዓይነት ጸገማት ከስዕብ ይኽእል። እቲ ጸገማት መብዛሕትኡ ግዜ ድሕሪ ሕርሲ ይጠፍእ እዩ።

ምንጻል ጥንሲ ንሓደ ጥንሲ ምቁራጹ ማለት እዩ። ጥንሲ ንምንጻል እትውስኒ ንስኺ ነፍሰ-ጾር ዝኾንኪ ባዕልኺ ኢኺ። እዚ ነጻ ምንጻል ጥንሲ ተባሂሉ ይጽዋዕ።

ነፍሰ ጾር ኣብ ዘለኽሉ እዋን ዕግርግር ክብለክን ከተምልሲን ንቡር እዩ። እዚ ዋላ’ዃ ደስ ዘይብል ይኹን፡ ንዓኺ ይኹን ነቲ ዕሸል ግን ዝጎድእ ኣይኮነን። ጽቡቕ ንኽስምዓኪ ክትገብርዮ ትኽእሊ ሓደ ሓደ ነገራት ድማ ኣሎ።

ነፍሰ-ጾር ኣብ ዘለኹሉ እዋን ኣብ ኣካላትኪ ዘለዉ መላግቦታት ዝያዳ ተንቀሳቐስቲ ይኾኑ። ኣብ ከባቢ ጎሎኺ ቃንዛ ክገብረልኪ ይኽእል እዩ። እዚ ልሙድ ኮይኑ መብዛሕትኡ ግዜ ድማ ድሕሪ ሕርሲ ይገድፍ እዩ።

ምረዛ ጥንሲ ነፍሰ ጾር ኣብ ዘለኹሉ እዋን ክሕዘኪ ዝኽእል ሓደ ሕማም እዩ። ልዑል ጸቕጢ ደም ይገብረልኪ። እዚ ንዓኽን ነቲ ቈልዓን ክጸልወኩም ይኽእል እዩ። ነቲ ጸቕጢ ደም ንምትሓቱ ዕረፍትን መድሃኒትን ከድልየኪ ይኽእል እዩ።

ማህጸን ጭዋዳ እያ። ማህጸን ሓደ ሓደ ግዜ ኣብ እዋን ጥንሲ ትውጠር እያ። እዚ ምጭባጥን ምዝርጋሕን ማህጸን ተባሂሉ ይጽዋዕ። ኣብ እዋን ሕርሲ እውን ማህጸን ትውጠር እያ። እዚ ቃንዛ ሕርሲ ተባሂሉ ይጽዋዕ።

ነፍሰ-ጾር ከለኺ ኣልኮላዊ መስተ ኣይትስተዪ። ኣልኮላዊ መስተ ነቲ ኣብ ከብድኺ ዘሎ ህጻን ክጎድኦ ዝኽእል ትሕዝቶ ናይ ሓደገኛታት ባእታታት ኣለዎ። ኣልኮላዊ መስተ ካብ ምስታይ ንሙቁራጽ ከቢድ ኮይኑ ምስ ዝስምዓኪ፡ ሓገዝ ክትረኽቢ ትኽእሊ ኢኺ።

ነፍሰ-ጾር ከለኺ ትምባኾ ትጥቀሚ እንተ ዄንኪ ጎዳኢ እዩ። እቲ ኣብ ከብድኺ ዘሎ ህጻን ካብቲ ትምባኾ ሓደገኛታት ባእታታት ኣብ ነብሱ ይኣትዉ እዮም። ስለዚ ነፍሰ-ጾር ከለኺ ትምባኾ ኣይትጠቀሚ። ንሙቁራጽ ከቢድ ኮይኑ ምስ ዝስምዓኪ፡ ሓገዝ ክትረኽቢ ትኽእሊ ኢኺ። ትምባኾ ንኣብነት ኣብ ሽጋራ ኣሎ።

ነፍሰ ጾር ከለኺ ናብ ሓደ ክሊኒክ ነፍሰ ጾራትን ሓራሳት ክትበጽሒ ትኽእሊ ኢኺ። እቲ ምብጻሕ ንስኽን እቲ ኣብ ከብድኺ ዘሎ ህጻንን ጥዕናኹም ከመይ ከም ዘሎ ንምምርማር እዩ። ቅድሚ ሕርሲ ንኽትቀራረቢ ምኽርን ሓገዝን ክትረኽቢ ኢኺ። እቲ ምብጻሕ ንዓኺ ካብ ክፍሊት ናጻ እዩ።

እተን ኪሓርሳ ዚቐረባ ደቀኣንስትዮ፡ ካብ ባህላዊት ክኢላ ሓገዝን ደገፍን ኪረኽባ ይኽእላ እየን። ባህላዊት ክኢላ፡ ከምቲ እትዛረብዮ ቛንቋ እትዛረብን ከም ናትኪ ባህሊ ዘለዋን ጓልኣንስተይቲ እያ። ብገዛእ-ርእስኻ ናይ ምሕራስ ተሞክሮ ዘለዋ ኮይና፡ ኣብ እዋን ጥንሲ፡ ሕርሲ እንታይ ከምዘጋጥምን ድሕሪ ሕርሲ ብዛዕባ ዘለዋ ናይ ፈለማ መዓልታትን ዚምልከት ሓበሬታ ድማ ክትህበኪ እትኽእል እያ።