ትምባኾን ጥንስን

ኵሉ ሰብ ትምባኾ ምጥቃም ከቋርጽ ይኽእል እዩ። እቲ ዘገድስ ካብ ናትኪ ድልየት ዝተበገሰ ምስ ዝኸውን እዩ።

እቲ ባህጊ ናይ ትምባኾ ምጥቃም መብዛሕትኡ ግዜ ንቑሩብ ደቓይቕ ጥራይ ከም ዝጸንሕ ዘክሪ።

መብዛሕትኡ ግዜ ነፍሰ-ጾር ከለኺ ምቍራጹ ዝቐለለ እዩ። ጥዕና ናይ’ቲ ቆልዓ ብዝተኻእለ መጠን ምእንቲ ጽቡቕ ክኸዉን ከተባብዓኪ ይኽእል እዩ።

እቲ ጥንሲ እውን ባዕሉ ትምባኾ ንምጥቃም ከም ዘይትብህጊ ክገብር ይኽእል እዩ።

ንኣብነት ሽጋራ፡ ሺሻ፡ ኤልክትሮኒካዊ-ሽጋራን ኣብ ትሕቲ ከንፈር ዝኣቱ ትምባኾን(snus)። እዚኣቶም ኵሎም ትሕዝቶ ናይ ከም ኒኮቲን ዝኣመሰሉ ሓደገኛ ባእታታት ኣለዎም።

ኒኮቲን ዘይብሉ ኤለክትሮኒካዊ-ሽጋራ ምግዛእ ይከኣል እዩ። ይኵን’ምበር ኣብ ኤልክትሮኒካዊ-ሽጋራ ካልኦት ሓደገኛታት ክኾኑ ዝኽሉ ባእታታት ኣለዉ። ስለዚ ነፍሰ-ጾር ከለኺ ኤለክትሮኒካዊ-ሽጋራ እውን ከተወግዲ ኣለኪ።

ትምባኾ ትሕዝቶ ናይ ሓደገኛታት ባእታታት ኣለዎ።

ትምባኾ ክትጥቀም ከለኺ ሓደገኛታት ባእታታት ናብ ደምኪ ይኣትዉ።
ደምኪ ናብ መዳሕንቲ ይኣቱ እዩ። እቶም ሓደገኛታት ባእታ ካብ መዳሕንቲ ናብቲ ቈልዓ ይኣትዉ እዮም።

ነፍሰ-ጾር ከለኺ ትምባኾ ምስ ትጥቀሚ እዚ ዝስዕብ ከጋጥም ይኽእል፦

• ጥንሲ ንኽኸይድ ዘሎ ተኽእሎ ክዓቢ ይኽእል።
• እቲ ህጻን ከም ዝግብኦ ኣይዓብን።
• መዳሕንቲ ቅድሚ ግዚኣ ካብ ቦትኣ ክትለቅቅ ትኽእል።
• ሕርሲ ቅድሚ ግዚኡ ክጅምር ይኽእል።

ትምባኾ እቲ ህጻን ኣብ ከብዲ ከሎ ወይ እቲ ህጻን ድሕሪ ምውላዱ ኣብ ዘለዋ ናይ መጀመርታ ሽዱሽተ ኣዋርሕ ንኽመውት ዘለ ሓደጋ ከም ዝዓቢ ክገብሮ ይኽእል እዩ።

ኣብ እዋን ጥንስኺ ትምባኾ ስለ ዝተጠቀምኪ ሕማቕ ይስምዓኪ ይህሉ። ከሕፍረካን ጣዕሳ ክስምዓካን ንቡር እዩ።

እቲ ዘገድስ ግን ነቲ ህጻን ንትምባኾ ብዝያዳ ዘይምቅልዑ እዩ።
ካብ ሕጂ ጀሚሩ ብዝተኻእለ ምጠን ከመይ ገይሩ ጽቡቕ ክኸውን ከም ዝኽእል ሕሰቢ።

ትምባኾ ምጥቃም ንምቍራጽ ሓገዝ ዘድልየኪ እንተ ኾይኑ ናብ ሕክምና ኪዲ።  

ምስ ሓደ ካብዞም ዝስዕቡ ክሊኒካት ርክብ ክትገብሪ ትኽእሊ ኢኺ፦

• ሓደ ክሊኒክ ነፍሰ-ጾራትን ሓራሳትን
• ሓደ ማእከል ክንክን ጥዕና

ኣስተርጓሚ ክግበረልኪ ይኽእል እዩ

ሽወደንኛ ዘይትዛረቢ እንተ ዄንኪ ኣስተርጓሚ ናይ ምርካብ ሓገዝ ክትረኽቢ ትኽእሊ ኢኺ። ቆጸራ ክትሕዚ እንከለኺ፡ ናይ ቋንቋ ኣስተርጓሚ ከም ዘድልየኪ ሓብሪ።

ናብ ቍጽሪ ተሌፎን 1177 ደዊልኪ ምኽሪ ርኸቢ

ብዛዕባ እንታይ ክትገብሪ ከም ዘለኺ ምኽሪ ምስ ትደልዪ ናብ ቍጽሪ ተሌፎን 1177 ደውሊ።

እተን ዝምልሳልኪ ኣለይቲ ሕሙማት እየን። ሽወደንኛን እንግሊዝኛን ይዛረባ እየን። ሓደ ሓደ ግዜ ብኻልኦት ቋንቋታት ሓገዝ ምርካብ ይከኣል እዩ።

ብናይ ወጻኢ ሃገር ቍጽሪ ተለፎን ምስ እትድውሊ፡ ናብ 0046 771-11 77 00 ደውሊ።

ኒኮቲን ዘለዎ ማስቲካ ወይ ፕላስተር ኣሎ። እዚኦም ነቲ ባህጊ ናይ ትምባኾ ከም ዝቕንስ ይገብርዎ። ግን እዚኦም መድሃኒታት ነቲ ህጻን ጎዳእቲ እዮም።

ነፍሰ-ጾር ከለኺ ወይ ኣብ ተጥብሉ እዋን ኒኮቲን ዘለዎ መድሃኒት ክትጥቀሚ እንተ ኣድልዩኪ ምስ ሓደ ሓኪም ተዘራረቢ።