መደብ ክታበት ንቈልዑ

ኵሎም ኣብ ሽወደን ዝቕመጡ ቈልዑ ጸረ እዞም ዝስዕቡ ሕማማት ክታበት ይቕረበሎም፦ 

• ዲፍተሪያ 
• ትኽትኽታ 
• ተታኑስ  
• ፖልዮ  
• ሀሞፊልስ ኢንፍሉወንሳ ዓይነት በ 
• ነውሞኮኩስ 
• ንፍዮ  
• ጽግዕ  
• ሩበላ  
• ሮታ ቫይረስ  
• ወይቦ ዓይነት በ 
• ሆፐቨ - ሰብኣዊ ፓፒሎማ ቫይረስ። 

መብዛሕትኡ ግዜ ነቲ ቈልዓ ብሓንቲ መርፍእ ሓያሎ ክታበታት ይወሃቦ።

ክታበት ቈልዑ በዞም ኣብ ላዕሊ ዝተጠቕሱ ሕማማት ብኸቢድ ንኸይሓሙ ይከላኸለሎም።  

ከም’ውን እቲ ክታበት እቲ ሕማማት ንኸይላባዕ ይከላኸል።. 

ክታበት ዘተኣማምን መድሃኒት እዩ 

ውላድካ ክኽተብ ምግባር ብወለንታ እዩ።  

ኣገልግሎት ክንክን ሕማም ኵሉ ሰብ ክኽተብ ይመኽሩ። 

ክታበት ዘተኣማምን መድሃኒት እዩ። 

ቈልዑ ኣብ እዋን ዕብየቶም ሓያሎ ግዜ ይኽተቡ።  

ናይ መጀመርታ ክታበት እቲ ህጻን ዕድሚኡ ሽዱሽተ ወርሒ ከሎ ይወሃቦ።

ቈልዑ ኣየኖይ ክታበታት ከም ዝወሃቦም ካብ ሃገር ናብ ሃገር ይፈላለ እዩ። 

ካብ ሽወደን ወጻኢ ኣብ ካልኦት ሃገራት ዝተወልዱ ቈልዑ ዝያዳ ክታበት ክወስዱ ከድልዮም ይኽእል እዩ። 

ንናይ ውላድካ ክታበታት ዝምልከት ሕቶታት ምስ ዝህልወካ፡ ምስ ሓደ ካብዞም ዝስዕቡ ክትራኸብ ትኽእል ኢኻ፦ 

• ማእከል ክንክን ጥዕና ቈልዑ፡ BVC  
• ጥዕና ተምሃሮ ኣብ ቤት ትምህርቲ (elevhälsan)  
• ሓደ ማእከል ክንክን ጥዕና (vårdcentral)

ቅድሚ ክታበት እቲ ቈልዓ እኹል ዕረፍትን መግብን ዝረኸበ ክኸውን ጽቡቕ እዩ። 

ይኹን’ምበር ጸረ ሮታ ቫይረስ ዝኽተብ ቈልዓ ኣቐዲሙ ክበልዕ የብሉን። 

እቲ ቈልዓ ምስ ዝጭነቕ 

ገሊም ቈልዑ መርፍእ ምውጋእ ከፍርሖም ወይ ከሕምም እዩ ኢሎም ክፈርሑ ይኽእሉ እዮም።  

ነቲ ቈልዓ እቲ መሰርሕ ክታበት ቅልጡፍ ከም ዝኾነ ንገሮ። ቁሩብ ከም ዘሕምም ግን ቀልጢፉ ከም ዝሓልፍ እውን ንገሮ። 

እቲ ቈልዓ እንተ ሓሚሙ 

እቲ ቈልዓ ክኽተብ ቆጸራ ተታሒዝዎ ነይሩ ግን ምስ ዝሓምም፡ ምስ ማእከል ክንክን ጥዕና ቈልዑ BVC ወይ ጥዕና ተምሃሮ ኣብ ቤት ትምህርቲ ርክብ ግበሩ። ሓድሽ ቆጸራ ምሓዝ ከድልየኩም ይኽእል እዩ። 

ክሳብ ደቂ ሓሙሽተ ዓመት ዝዕድሚኦም ቈልዑ ኣብ BVC ይኽተቡ። 

ትምህርቲ ዝጀመሩ ቈልዑ ኣብ ጥዕና ተምሃሮ ኣብ ቤት ትምህርቲ ይኽተቡ። 

እቲ ቈልዓ መርፍእ ይውጋእ 

ትሕቲ ሓደ ዓመት ዝኾኑ ቈልዑ መብዛሕት ግዜ ኣብ ሰለፎም መርፍእ ይውግኡ።  

ልዕሊ ሓደ ዓመት ዝዕድሚኦም ቈልዑ ኣብ ላዕለዋይ ክፋል ቅልጽሞም ነቲ መርፍእ ይውግእዎ። 

ጸረ ሮታ ቫይረስ ክታበት ነቲ ቈልዓ ኣብ ኣፉ ይወሃቦ 

ክታበት ጸረ ሮታ ቫይረስ ብነጠብጣብ ዓይነት ይወሃብ።

እቲ ክታበት ነቲ ቈልዓ ኣብ ኣፉ ይወሃቦ።  

እቲ ፈሳሲ ሙቁር ጣዕሚ ኣለዎ። 

ኣብቲ እቲ ቈልዓ መርፍእ ዝተወግኣሉ ቦታ ቁሩብ ቃንዛ ክገብረሉ ይኽእል እዩ።  

ድሕሪ ምኽታብ እቲ ቈልዓ ቁሩብ ሕማም ክስምዖ ልሙድ እዩ። እቲ ቈልዓ ንኣብነት ረስኒ ክገብረሉ ይኽእል እዩ። መብዛሕትኡ ግዜ ቀልጢፉ ይሓድግ እዩ። 

እቲ ቈልዓ ድሕሪ ናይ ሮታ ቫይረስ ክታበት ምውሳዱ ዕግርግር ክብሎን ከብዱ ከሕምሞን ይኽእል እዩ።

መብዛሕትም ዝተኸተቡ ቈልዑ ምስ ሕክምና ርክብ ምግባር ኣየድልዮምን እዩ።  

ሕቶታት ምስ ዝህልወካ ወይ ምስ ትሻቐል ምስቲ እቲ ቈልዓ ዝተኸተበሉ ክሊኒክ ርክብ ግበር።  

ብዛዕባ እንታይ ክትገብር ከም ዘለካ ሓገዝ ምስ ዘድልየካ ናብ ቍጽሪ ተሌፎን 1177 ደውል። እተን ዝምልሳልካ ኣለይቲ ሕሙማት እየን። ንሰን ሽወደንኛን እንግሊዝኛን ይዛረባ እየን። ሓደ ሓደ ግዜ ብኻልኦት ቋንቋታት ሓገዝ ምርካብ ይከኣል እዩ። ብናይ ወጻኢ ሃገር ቍጽሪ ተለፎን ምስ እትድውል፡ ናብ 0046 771-11 77 00 ደውል።

ህጹጽ ምስ ዝኸውን

እቲ ቈልዓ ኣብ ከብዱ ብርቱዕ ቃንዛ እንተ ገይርሉ ብቕልጡፍ ምስ ሕክምና ርክብ ግበር። ምስ ሓደ ካብዞም ዝስዕቡ ክሊኒካት ርክብ ግበር፦

• ሓደ ማእከል ክንክን ጥዕና 
• ሓደ ተርኛ ክፉት ዝኾነ ክሊኒክ። 

ዕጹው ምስ ዝኸውን፡ ንሕክምና ናብ ሓደ ክፍሊ ህጹጹ ረድኤት ኪድ።
 
እቲ ቈልዓ ኣካላቱ ምሉእ ብምሉእ ምስ ዝደክም ቀልጢፍካ ናብ 112 ደውል።