Mammograafije – gïehtjedimmie njammijste
Mammografi Jämtland Härjedalen - andra språk - sydsamiskaThe content concerns Jämtland HärjedalenMammograafije lea gïehtjedimmie njammijste. Giehtjedimmine maahta vueptiestidh mejtie bankaldahkem njammine åtnah jallh mejtie dam åadtjoeminie. Mammograafijinie maahta aarehke daam skïemtjelassem vueptiestidh jïh maahtah båehtjierdimmiem åadtjodh. Mammograafije lea åesehts.
Läs texten på svenska här.
Mij lea mammograafije?
Mammograafije lea akte giehtjedimmie njammijste röntgeninie. Daejnie giehtjedimmine maehtebe vuejnedh mejtie naan jarkoestimmieh njammine. Maahta naa smaave bankaldahkh utnedh maam ij jïjtje damth. Læjhkan mejtie naan jarkoestimmieh njammine, ij leah barre iktesth vaarege. Muvhth aejkien maahta bankaldahkeste skeamtjodh.
Njammabankaldahke lea dïhte sïejhmemes skïemtjelasse nyjsenæjjide. Båarasåbpoe sjædta sïejhmebe daestie skeamtjodh. Jis varke bankaldahkide vueptesth dle maahtah deelhkedh.
Man gaavhtan mammograafijasse gohtjesovvem?
Gaajhkh nyjsenæjjah Sveerjesne mah gaskoeh 40-74 jaepien båeries mammograafijasse gohtjesuvvieh, medtie fïerhten mubpeden jaepien. Gaajhkh nyjsenæjjah jïjtsh gåhtjomem nååhtedimmine åadtjoeh.
Datne maahtah orresth nååhtedidh, jis ij dïhte tïjje dutnjien sjïehth. Datne maahtah aaj jïjtje healsoejarngesne tïjjem dangkodh.
Datne maahtah mammograafijasse vaedtsedh jalhts nåajsan jallh njammeminie. Döömh njammide mammograafije giehtjedimmien åvtelen, dle aelhkebe sjædta.
Jïjtje veeljh mejtie sïjhth mammograafijasse vaedtsedh, menh joekoen hijven dam darjodh.
Datne maahtah voelpem jallh toelhkem meatan vaeltedh
Akte skïemtjesåjhtere mammograafijem dåastovisnie dorje.
Gaajhkh barkijh dåastovisnie sjeavodhdïedtem utnieh, guktie eah luhpiem utnieh gïese jiehtedh datne debpene mïnneme.
Joekoen vihkeles datne guarkah maam daah barkijh jiehtieh. Jis ih daarosth, dle reaktam åtnah toelhkem utnedh. Toelhken sjeavodhdïedte. Bieljelh dåastovem åvtelen jis toelhkem daarpesjh.
Datne maahtah aaj voelpem jallh gïem akt fuelhkeste meatan vaeltedh. Fuelhkie jïh voelph eah leah toelhkh jïh eah sjeavodhdïedtem utnieh.
Naemhtie giehtjedimmie jåhta
Datne tjïehtjelasse tjaangh gusnie akte abpereaate mij guvvieh kråahpen sjisjnjelh vaalta. Dan nomme röntgene.
Datne tjoerh naan gyhtjelassh vaestiedidh, vuesiehtimmien gaavhtan:
- Mejtie datne vueptiestamme maam akt båajhtah njammine?
- Mejtie p-pillerh åtnah jallh naan jeatjah daalhkesh hormovnigujmie?
Datne tjoerh tråajjide noeledidh, jïh abpereaaten lïhke tjihkedidh jallh tjåadtjodh. Dïhte skïemtjesåjhtere datnem vuesehte guktie edtjh gïetide utnedh jïh guktie edtjh tjåadtjodh. Pryövh stille tjåadtjodh.
Skïemtjesåjhtere datnem viehkehte aktem njammam abperaaten nille bïejedh. Dan mænngan akte jeatja skijva dam njammam deadta, guktie dïhte njamma plïehtje sjædta. Naan gille sekundh vaalta guvvieh vaeltedh. Daerpies göökte, golme guvvieh fïerhte njammeste. Abpe daate giehtjedimmie vaalta medtie 15-30 minuhth.
Gåessie vaestiedassem åadtjoem?
Medtie göökte våhkoeh vaaseme dle datne vaestiedassem åadtjoeh. Datne prieviem åadtjoeh jallh gie dutnjien ringkie. Dïhte prievie seedtesåvva dov årromesijjie adressese. Jis maam joekehtse dej dov njammine, dle tjoerh bååstide båetedh.
Datne maahtah jïjtje gïehtjedimmien mietie gihtjedh
Datne maahtah jïjtje håksoem bieljelidh jïh giehtjedimmien mietie gihtjedh. Bieljelh håksoem jis datne maam rovnegs njammine vueptiestamme, vg. jis damth maam garres. Dåaktere tjuara dellie datnem gïehtjedidh.
Maahtah barre iktesth telefovnenommerem 1177 ringkedh jis dov naan gyhtjelassh jallh raerieh daarpesjh. Dah mah telefovnem vaestiedieh leah skïemtjesåjhterh. Dah maehtieh vaestiedidh jis tjoerh dååkterasse ringkedh.
Datne maahtah daaroestidh jallh englaantengielesne soptsestidh. Lea åesehts ringkedh 1177.