Håksoegarantije
Vårdgaranti - Jämtland Härjedalen - sydsamiskaTïjje-maaje gååvnese mij jeahta man guhkiem tjoeverh vuertedh goske håksoem åadtjoeh. Jis datne leah fer guhkiem vuarteme vaestiedæmman aktede dåastovistie dov lea reakta håksoem åadtjodh jeatja dåastovisnie. Dïhte reakta håksoegarantijinie gohtjesåvva.
Dov lea ajve håksoegarantije daennie håksoejarngesne (vårdcentral eller hälsocentral) man nuelelen leah. Gosse håksoejarngem veeljh, dellie datne dennie håksoejarngen læstosne tjaalasovvh.
Datne aaj håksoegarantijem åtnah såemies dåastovisnie mïsse ih maehtieh tjaalasovvedh. Vuesiehtimmien gaavhtan dam reaktam åtnah dovne noeredåastovisnie, tsegkietniedåastovisnie jïh maanahåksoejarngesne.
Naemhtie håksoegarantije jåhta
Håksoegarantije sjïere reaktah dutnjien vadta:
Gaskese håksoejarngine seamma biejjien
Datne edtjh gaskesem åadtjodh dejnie håksoejarngine mesnie leah tjaalasovveme seamma biejjien goh håksoem ohtsh.
Vuesiehtimmien gaavhtan maahtah håksoejarngem ringkedh jallh håksoejarngesne mïnnedh. Gellie dåastovh aaj videjove-soptsestimmieh faelieh.
Vïerhtiedimmie dov daerpiesvoeteste håksose eannan golme biejjieh leah vaaseme
Håksoejarngen barkijh nænnoestieh jis edtjh håksoem åadtjodh. Nænnoestimmie tjoevere dutnjien båetedh eannan golme biejjieh leah vaaseme dov syökemebiejjeste.
Nænnoestimmie maahta båetedh vg. dåaktaristie, skïemtjesååjhteristie jallh fysioterapije-barkijistie.
Mïnneme aktene sjïere-dåastovisnie eannan 90 biejjieh leah vaaseme
Muvhtene datne håksoem aktede sjïere-dåastovistie daarpesjh. Dïhte barkije maam leah håksoejarngesne råakeme remissem sjïere-dåastovasse seedtie. Remissesne bïevnesh dov dåeriesmoeri bïjre.
Datne edtjh bööremem sjïere-dåastovistie åadtjodh akten mïnnemasse eannan 90 biejjieh leah vaaseme jis sjïere-dåastove nænnoste datne edtjh sjïere-håksoem åadtjodh. Saaht seamma jis sjïere-håaksoem jïjtje ohtsh, dåaktere-remissen namhtah.
Gïetedalleme aalka eannan 90 biejjieh leah vaaseme
Datne edtjh gïetedallemem åadtjodh eannan 90 biejjieh leah vaaseme. Sjïere-dåastoven dåaktere nænnoste dov ektine jis edtjh sjïere-håksoem åadtjodh. Vuesiehtimmien gaavhtan jis edtjh operasjovnem åadtjodh.
Muvhth regijovnh åeniehkåbpoe vuerteme-tïjjh utnieh eannan dah edtjieh håksoem dutnjien faaledh.
Jis ih håksoem åadtjoeh håksoegarantijistie
Fïerhtene regijovnesne almetjh gååvnesieh mah maehtieh dov gyhtjelassh håksoegarantijen bïjre vaestiedidh. Muvhten sijjien dah leah håksoe-tsïegline gohtjesovveme. Jis fer guhkiem håksose vuarteme håksoe-tsïegle maahta datnem viehkiehtidh håksoem jeatja dåastovistie åadtjodh. Muvhtene jis jeatja regijovnesne enn dennie regijovnesne mesnie leah tjaalasovveme.
Ih maehtieh jïjtje dåastovem veeljedh jis sïjhth håksoegarantijem nuhtjedh.
Maahtah håksoem jeatja dåastovistie nyöjhkedh. Dellie ij håksoegarantije datnem vielie tjaakene, jïh maahtah åadtjodh guhkebe vuertedh goske håksoejarnge håksoem dutnjien faala.
Jis datne dov nyöjhkemem aangkerdh
Gaskesadth dejnie dåastovinie mestie håksoefaalemem åådtjeme jis aangkerdh datne dam faalemem nyöjhkeme.
Dov leah viht håksoegarantije dehtie biejjeste gosse bïeljelih datne dov nyöjhkemem aangkerdamme.
Jis håksoem jeatja regijovnesne syökh
Skaehtievïerhke gïetedalla gusnie datne leah tjaalasovveme. Åålmegetjaalasovveme dïhte. Dov lea ajve håksoegarantije dennie regijovnesne gusnie leah tjaalasovveme. Ij leah vihties man guhkiem tjoeverh håksose vuertedh jallh jis datne edtjh håksoem åadtjodh jis håksoem jeatja regijovnesne ohtsh.
Dov håksoedaerpiesvoete nænnoste man spaajhte datne håksoem åadtjoeh. Voestegh dah almetjh mej stoerremes daerpiesvoetem utnieh håksoem åadtjoeh. Saaht seamma gusnie almetjh leah tjaalasovveme.
Muvhth regijovnh latjkoem jeatja regijovnigujmie utnieh mij sæjhta jiehtedh datne maahtah aaj håksoegarantijem jeatja regijovnine nuhtjedh. Soptsesth håksoebarkijinie jis sïjhth daejredh guktie lea dov regijovnesne.
Datne edtjh bïevnesh åadtjodh håksoegarantijen bïjre
Gïhtjh håksoegarantijen bïjre dennie dåastovisnie mesnie leah håksose vuertieminie. Dah edtjieh bïevnesh dutnjien vedtedh håksoegarantijen bïjre. Vihkeles datne guarkah guktie dov veeljemh tsevtsieh man guhkiem tjoeverh håksose vuertedh.