Rávvagat dutnje geas lea covid-19

Lea dehálaš juhkat ollu erenoamážit jus dus lea feber dahje gosahat.

Sáhttá leahkit vuogas juhkat juoga lieggasa dahje galbmasa jus dus lea čotta bávččas. Juga ovdamearkka dihte čázi, deaja, liema dahje mállása. Don sáhtát maid borrat jieŋa dahje yoghurta.

Lea buorre jus sáhtát vealahaddat oivviin loktosis. Veahkeha jus gosat ollu.

Bija fal liige bolstariid oaivvi vuollái go nohkat.

Sáhttá leahkit vuogas gálus lanjain doppe gos nohkat.

Don sáhtát ovdamearkka dihte vuolidit elemeantta lieggasa dahje rahpat láse.

Don dárbbahat vuoiŋŋastit go leat skibas. Muhto ii leat buorre veallát loktu ila guhká.

Lea buoret jus geahččalat lihkkat.

Dát leat ovdamearkkat maid sáhtát geahččalit dahkat:

• Lihkadit julggiid.
• Molssu gilgga man nalde veallát duos dás.
• Čohkkát dahje čuoččat duos dás.

Go veaját buorebut de geahččal leahkit olgun ja lihkadit. Ale daga eanet go nagat.

Don sáhtát geavahit dálkasiid parasetamolain jus dus lea alla feber.  Dálkasiidda ii dárbbaš reseaptta.

Mánát badjel guhtta mánu sáhttet geavahit dálkasiid parasetamolain. Jus mánná lea nuorat go guhtta mánu de galggat jearrat doaktáris álggus.

Dus geas lea čottabávččas sáhttát geahččalit čottatableahtaid.

Don sáhtát geavahit njunnegoaikkanasaid jus njunni lea buđđosan. Gávdnojit  njunnegoaikkanasat ja njunnespráija mat sisdollet sáltečázi masa ii dárbbaš reseaptta.

Gávdnojit maid njunnegoaikkanasat ja njunnespráija mii unnida bohtaneami njunis masa ii dárbbaš reseaptta. Dakkár njunnegoaikkanasaid dahje njunnespráijaid galggat geavahit eanemusat logi beaivvi.

Geahččal garvit borgguheami dahje leahkit doppe gos earát borgguhit. Gosahat vearrána suovas.

Sáhttá dovdot oktonas leahkit ruovttus. Ollu olbmuid mielas lea lossat go eai beasa gávnnadit daid olbmuiguin geaiguin lávejit oaidnalit.

Geahččal goitge doallat oktavuođa ustibiiguin ja veagain. Dii sáhttibehtet ovdamearkka dihte riŋget guhte guimmiide. 

Lea buorre geahččalit dahkat diŋggaid seammá áiggiid go dábálaččat. Don sáhtát ovdamearkka dihte lihkkat ja borrat iđitbiepmu dan áiggi go lávet.

Riŋge telefonnummara 1177 jus háliidat veahki maid galggat dahkat. Sii geat vástidit leat buohccedivššárat. Sii sáhtte maid veahkehit du gávdnat gos galggat ohcat divššu, jus veaját heajubun.

Buohccedivššárat ságastit ruoŧagiela ja eaŋgalasgiela. 

Riŋge +46 771-11 77 00 jus riŋget telefovnnas mas lea olgoriikanummar.