SOLOARAK NUCKOAR

Jakktharibe ke nuckoar - so nast diro solus kera?

Ögoninflammation hos barn - vad kan man göra själv? - resanderomska

Jad bùttvar preal schettani andre jeck phagel

Dolle honkar butvar ninna jakktharibe ke nuckoar, bùttvar an phandin ninna jeck virusinfekcija savo sudraripe. Jakkarne nast bliddra lollo ta holjamo ta dolle honkar makkhela panipe, sav buttvar nast asha galbano, fann. Jakken jakkarne nast jura suvlo baro. Vri gla dolle hembut bliddrar dolle tjibbigt akkter jeck phagel biso arak. Jakktharibe doliber lokki.

Nuckoar nast aur fussa tharibe an jakkarna attjer vaver soskip. Kava nast adhine pre jeck allergisk soskip ire te nuckon anaven ire fussat ful an. Jakkarne tharibe honkar jukk sutt gla.

Nast nuckoar ja to anglskedrabblehisp?

Nuckoar savo kammar jakktharibe ninna lollo jakkar ta makkhela panipe jeck teckno sudraripe mostul tji asha kherat fann anglskedrabblehisp bàsi dolle prinjar siro fediga vavros. Nuckoar savo jad pre anglskedrabblehisp nachta asha sav jangno te dova nashtar asha ninna an sàssaro. Nuckoar ninna allergi an jakkarna mostula tji asha kherat.

Nuckoar saste bliddra kherat bàsi jackorna honkar besjat

Bàsi nuckons jakkar terlinela kattlo ta diro mostula tosa besjat nekli jakkarna butt tjiros pre jeck divus kammar nuckon jeck baro.tharibe Gla dolle buttaste honkar solduj jakkarna holjamo ta dolle nast ava besjat. Nuckon saste dannro ascha asha kherat fann anglskedrabblehisp gla te tji dolibe vaver manish ta nuckoar, ta gla jackorna mostula tovvas butt. Nuckon nast ja veder to nuckorna karna dova tùlloa tharibe kammar bliddrat fedig ta jackorna tji honkar besjat buttare.

Jakktharibe ja lokkist ninna tecknoa nuckoar aschtersavo dova honkar sav butt nerrider vàrvara. Dolibe nast spreddra karna nuckoarna morela pre siro jakkar ta senslo ler pre siro khelibesej ire pre vaver nuckoar. Dràbbrahispnuckorna kammar tji savriga kontakti abbo niga jeck tùllo tharibe nast dolle biddra kherat bàsi jakkarna honkar buti holjamo.

Tovva jakkarna ninna pani

Bàsi nuckon kammar besjat an jakkarna honkar dolle tjibbigt te tovva juro jakkarna sav buttvar dolle mostula ninna.pani Ismarela jeck kompress ire bomull ta tovva fann jakkriggen koro dova. Andri.

Asha sukar ninna vashthigiena

Gla te sastro gla jakkinfekcija honkar dolle fedigt te asha sukar ninna te tovva varslorna bàsi buttar manish nerrider diro honkarsudardoa. Dolle honkar aur fedigt bàsi diro solduj kheret ta an anglske´drabblehisp bùttvar parrar vashtdikklo.

Nevobijani nucko

Dolle honkar buttast te nevobijani nuckor kammar galbano thavdipe an jakkarna, savi adhinela pre te dova kammar tecknoa rovadrommar jeck puranoanuckor ta baro manish. Tovva juro jakken fann dova avri jakkriggen koro dova andri ninna jeck kompress ire bomullstuss savo honkar tjindo ninna panistato ire lonnpani.

Diro nast hòftara kontakti ninna araken

Jakkthariber savo tji kammar jad schettani pre jeck phagel mostula arakas ninna antibiotika. Abbo diro nast le kontakti akracentrali. Akkter dy divusar arak ninna antibiotika dolibe tji infekcijanen to vaver manisch ta nuckon nast ja veder to anglske´drabblehisp.

Diro saste tji biddra ninna te le kontakti akracentrali bàsi nuckon kammar jeck butt tùllo tharibe ta kava keras butt besjat. Savrige aschar bàsi nuckon honkar hosalo gla mommali ire kammar kerri sudraripe bàsi nuckon kammar pharipe ninna jikk jakk bàsi diro opatjalot te nuckon kammat anavenet jakken mostula diro kontakti arakcentrali.

Bàsi jikk nevobijani nucko kammar jeck jakktharibe nachta diro le kontakti araken arakhlon tede.

Diro nast sarstil tava dukkalaaraken godidjbe gla te kamma rodi.

To the top of the page