Disavo var (mal, puti) šaj ka trebel tut arakhiba ki disavi javer klinika a na kori so obično džaja. Tegani kaj te šaj te dža othe ka trebel tut jek uput (bičhalin).

Tu šaj korkori te birine ki savi ambolanta ja pale klinika ka dža keda ka trebel tut phravdo arakhiba. Tu šaj te birine phravdo arakhiba ki sa i Švedia.

Te preperea ko nacionalno minoriteti, si tut hako, nesave čhipotende (slučajende), te koristine tiri čhib kana kereja kontakti e arakhibaskere centarea. Drabar (čitin) so ovela ko vavera situacie.

Odoleske sarine so kerena buti ko sastipaskoro hem nasvalipaskoro arakhibe isi olen garavipaskoro dužnost. O osnovno principi tano niko kotar o arakhibe te na mukhel disave podatke sa dži kote manuš na dozvolinela odova korkori. Odova šaj te važinel ko primer podatke bašo disavo nasvalipe so isi disave manuše, savo sastljaribe dela pe e manušeske ja pale baši oleskiri/olakiri privatno situacija.

Te sine manuš ko jek doktori hem te dindža pe oleske jek nasvalipaskoro odgovor kova šaj te značinel kaj manuš trebela te anel jek pharo medicikano rešenje, tegani manuše isi pravo te del pe oleske/olake jek nevo medicikano proceniba taro jek javer doktori, angleder bašo odova vakerela pe sine second opinion. O cili e neve medicikane procenibaja tano te ovel pe sigurno kaj manušeske dela pe arakhiba hem sastljariba so ka pasujnel šukar.

Tu šaj te telefonirine dive-rat ko telefonikano broj 1177. Othe šaj dela pe tuke nasvalipaskoro godidejbe (savet/sovet) hem šaj phenela pe tuke save kliniken ja pale ambolanten šaj te kontaktirine bašo pomoč. Obično trebela te rode pomoč ki ambolanta ja pale ko slična thana bašo o pharipa so isi tut ama so nane akutna ja opasna bašo dživdipa. Te trebindža tu šaj te ove bičhaldo/bičhaldi tari ambolanta ko javera specijalna doktorija ko nasvalengoro kher (bolnica).

O pacientengoro zakoni kerdža pe te ovel ko šukaripe tuke sar pacienti. Othe terdžola kaj tuke ka del pe informacija bašo tlo nasvalipa hem save sastljariba šaj te oven.Tegani tu šaj te učestvine hem te odlučine bašo tlo arakhiba. Tuke isto ka del pe informacija kori šaj te birine o arakhibe so trebela tuke.