Tutkimuksia / pruuvia

Jynekolookinen sellipruuvinotto

Gynekologisk cellprovtagning - tornedalsfinska

Läs texten på svenska här.

Ottamalla säänölisesti jynekolookisen sellipruuvin sitä saattaa suojata ittensä kohtukaulankanserista (livmoderhalscancer). Sellipruuvi otethaan alapään kohtutapista ja se saattaa varhain näyttää jos on saanu sellimuutoksia jokka saattavat johtaa kohtukaulankanserhiin.

Suuriin osa sellimuutoksista mitä huomathaan on lievempiä muutoksia jokka parantuvat ittesthään, mutta muutamat häätyy ottaa pois. Hyvin epätavalisissa tapahtumissa sellipruuvi saattaa näyttää ette on saanu kanserin. Sillon kanseri pruukaa olla varhaisessa vaiheessa ja hoito saattaa tulla helpomaksi ja vähemillä sivuvaikutuksilla.

Vaimoja Ruottissa kuttuthaan säänölisesti jynekolookisheen sellipruuvinothoon, niin kuttuttu screeninki. Jos sitä on 23 ja 50 vuoen välissä kuttu tullee joka kolmas vuosi. Sen jälkhiin tavalisesti joka viies vuosi siihen asti ette on täyttäny 60 vuotta. Jos sitä on yli 50 vuotta rytiinit saattavat vaihtella vähän riippuen missä sitä assuu maassa.

Sitä saattaa kans saa jättää sellipruuvia jos sitä on baarmurskan eli jynekolookin tykönä missä tehhään jynekolookisen tutkimuksen muista syistä.

Valmisteluja

Sitä ei tartte valmistautua milhään erikoisela tavala, mutta se on hyvä jos ei ole pitäny seksiä eli käyttäny mithään salvaa alapäässä vuorokautta ennen tutkimusta. Siinä taphauksessa pruuvin saattaa olla vaikea tulkita. Sen lisäks, sitä ei piä jättää pruuvia kun on mensi.

Kuinkas tutkimus tehhään?

Kun pruuvi jätethään sitä saapi riisua vaatheet ruuhmiin alapuolelta ja panna maata jynekolookisheen tutkimustoolhiin. Lääkäri eli baarmurska saattaa ottaa pruuvin vähän eri tavoila. Usseimiten käytethään pientä pinnaa, eli spatel, jolla pyhithään kohtutappia ja sitten pieni pehmeä porsta kohtukaulankanaalin alapäässä.

Useasti saapi kans vastata muutamhiin kysymykshiin pruuvioton aikana. Vastaukset on tärkeät ette pruuvi analyseerathaan oikeala tavala.

Tutkimus ei ota kipeästi ja viepi vain muutaman minuutin aikaa ette tehhä. Vastaus sellipruuvista pruukathaan saa kuuen viikon aikana.

Kuinkas voipi jälkhiinpäin?

Pruuvinotto on vaaraton. Välistä saattaa vuotaa vähäsen jälkhiin mutta se on vaaratonta.

To the top of the page