Terhveyskeskus on vasthaanotto joka useasti on sinun asunon lähelä.

Terhveyskeskuksessa on lääkäriä, sairhaanhoitajia ja muu hoitohenkilökunta. Net saattavat auttaa, jos sie eli joku sinun perheessä on kipeä eli on masenus.

Terhveyskeskus on auki arkipäivinä

Terhveyskeskus on aina päivän aikana auki maanantaista perjantaihin. Jokkut terhveyskeskukset voivat olla auki muila aikoinaki.

Sinun pittää useasti varata aijan ennen kun tulet.

Täältä sie saatat hakea terhveyskeskuksen joka on sinun lähelä. (Sivu ruottiksi.)

Valitte terhveyskeskuksen Västerbottenissa

Sie päätät itte minkä terhveyskeskuksen kans sie haluat saa yhteyttä, kun sie tarttet hoitoa.

Sie voit lukea lissää kuinka sie tehet sen sivulta Valita terhveyskeskus Västerbottenissa. Sie saatat kans pyytää ette kohata saman lääkärin, joka kerta kun sie käyt terhveyskeskuksessa. Tätä kuttuthaan fastaks lääkärikontaktiksi (fast läkarkontakt).

Jos sie tarttet hakea hoitoa kun terhveyskeskus on kiinni, saattaa ette on sjuurivasthaanottoja. Ne on auki illoila ja viikonloppuna.

Täältä sie saatat hakea sjuuriauki vasthaanottoja. (Sivu ruottiksi.)

Soita 1177 ennen sinun käyntiä

Jos sie sairastut illala eli viikonloppuna, sillon sie soitat numerhoon 1177 ette saa neuvoja saihraanhoitajalta.

Sillon sie saat apua arvioittemhaan sinun symtoomia, ja sairhaanhoitaja saattaa jos tarvittee sanoa, mihinkä sie piät mennä ette saa akyyttiä apua.

Hae hoitoa akyytti vasthaanotossa (akutmottagning ), jos sie olet loukanu vakavasti eli sairastut vakavasti. Net on auki ympäri vuorokauen. Sie et tartte varata aikaa etukätheen.

Joka on enniiten sairas akyytti vasthaanotossa saapi hoitoa ensimäiseks. Tämä merkittee, ette sie, joka et ole vakavasti sairas, saatat saa oottaa ette saa apua.

Täälä on akyyttivasthaanotot

Kaikissa Västerbottenin sairaloissa on akyyttivasthaanottoja.

• Akutmottagning Lycksele
• Akutmottagning Skellefteå
• Akutmottagning Umeå.

Sie piät soittaa puhelinnumerhoon 112, jos on hyvin hoppu asia eli jos sinun eli jonkun muun elämä on vaarassa.

Henkilö joka vastaa puhhuu ruottia eli engelskaa, mutta voipi jos tarttee saa apua tulkilta. Ambylansi lähätethään, jos sie eli se joka on sairas tarttee kätevästi päästä akyytti vasthaanothoon.

Kaikila lapsila kuutheen ikävuotheen asti on erikoisia vasthaanottoja. Näitä kuttuthaan lasten terhveyskeskukseksi (barnhälsocentraler). Lapsi saapi säänölisesti käyvä sielä. Sielä lapsi saapi vaksinasjuunia. Tästä saatat hakea lasten  barnhälsocentraler /terhveyskeskuksia. (Sivu ruottiksi.)

Joissaki paikoissa on erikoisia lasten sairalhoita ja akyytti vasthaanottoja.

Nuorten vasthaanotto (ungdomsmottagningen), on auki sulle joka olet 13 ja 25 vuen välissä. Sieltä saat apua esimerkiks preventiiviainheile, raskhaustestile, sukupuolitauvile eli saa keskustella ja neuvontaa.

Lue lissää sivulta youmo.se. Täältä löyvät ungdomsmottagningar / nuorten vasthaanottoja. (Sivu ruottiksi.)

Vaimoile on erikoisia vasthaanottoja. Niitä kuttuthaan paarmurska/kätilövasthaanotto, (barnmorskemottagning), äititerhveyskeskus, (mödrahälsocentral ), eli vaimoterhveyshuolto, (kvinnohälsovård). Sieltä sie voit saa apua esimerkiks neuvonnassa, preventiiviainheissa ja erilaisitten sairhauksitten testauksessa. Sie saatat kans tulla kontrolhiin, jos sie olet raskhaana.

Kun sie piät synnyttää, sie saat tulla synnytysosastole (förlossningsavdelning). Net on auki ympäri vuorokauven.

Täältä sie saatat hakea barnmorskemottagningar/paarmurska/kätilövasthaanottoja. (Sivu ruottiksi.)

Joskus sie saatat tarttea hoitoa muussa vasthaanotossa. Se saattaa esimerkiksi olla ihovasthaanotto, psykiaatrivasthaanotto eli silmävasthaanotto.

Silloin sie saatat tarttea niin kututun remissin. Remissi sisältää tietoja, ette sie tarttet tutkimuksen eli hoitoa. Henkilö, ketä sie kohtaat terhveyskeskuksessa, voipi lähättää remissin.

Sie saatat joutua oothaan ette saa aijan sellaisheen vastaanothoon.

Joissaki rekiuunissa sie voit käyttää viiteopuhelun lääkärin eli muun hoitohenkilökunnan kans, esimerkiks mubiililla.

Hammashoito on useasti tyyrhiimpi kuin muu hoito. Kysy etukätheen, mitä käynti maksaa. Lapset ja nuoret saavat usseimiten ilmhaisen hammashoijon.

Lue lisää siittä, kuinka tandvården fungerar i Sverige / hammashoito toimii Ruottissa. (Sivu ruottiksi.)

Täältä sie löyvät tandvård / hammashoitoa. (Sivu ruottiksi.)

Kostanus vaihtelee kun hakkee hoitoa Ruottissa. Esimerkiks akyytti vasthaanotto maksaa enemän kun terhveyskeskus.

Kostanukset vaihtelevat kans riippuen sinun iästä ja siittä, jos sie asut Ruottissa eli tulet muusta maasta.

Useasti lapsista ja nuorista ei tartte maksaa.

Sulla saattaa olla oikeus tulkhiin, jos sie et puhu ruottia. Tulkila on vaitiolovelvolisuus. Tulkkiavusta sie et maksa mithään. Ota yhteyttä hoijon kans ennen kun sie tulet paikan pääle ette saa apua sinun omala kielelä.

Koko henkilökunnala on vaitiolovelvolisuus. Tämä merkittee, ette henkilökunta ei saa selittää sinusta mithään kenelekhään henkilöile hoijon ulkopuolela. Vaitiolovelvolisuus koskee kaikkia työntekijöitä ketä sie kohtaat hoijossa, mukhaan luettu kans tulkit ja aputeekin henkilökunta.

Kun sie haet hoitoa, sie tarttet sanoa sinun nimen ja kuka sie olet. Jos sulla on dokymenttiä, jokka vahvistavat sinun identtiteettiä, net on hyvä jos sie otat sinun mukhaan.

Sivula youmo.se on tietoja vaitiolovelvolisuuvesta ja salhaisuuvesta sulle joka olet nuori. (Sivu on ruottiks.)