Tiukempia kehotuksia Västerbottenissa

Kaikile Västerbottenissa

• Ole yhteyvessä vain muutaman ihmisen kans.
  Sie saatat olla yhessä henkilöitten kans joita sie normaalisti kohtaat. Jos sie kohtaat muita henkilöitä kun sinun lähimäisen joukkoa, sie ja ketä sie kohtaat piättä pittää fyysistä distansia. Olkaa mielumin yhessä ulkona ja ajatelkaa pittää distansia sieläki.
• Välttäkää paikkoja missä on tukkimisen vaara.
  Se saattaa olla esimerkiks kolektiiviliikentheessä, kauppakeskuksissa ja kaupoissa. Osta aikoina kun on vähän henkilöitä kaupassa. Sie piät olla kaupassa niin lyhyn aijan kun maholista ja mieluiten ostaa yksin.
• Jatka olla töissä kotoaa niin useasti kun sie saatat.
  Jos sie et saata olla töissä kotoaa niin sie piät välttää tukkimista, pittää distansia ja kohata niin vähän ihmisiä kun maholista. Se koskee kans fiikkahuonetta ja henkilökunnan olohuonetta. Jos sulla on hengitystien symtoomia eli muita covid-19 merkkiä, myös liepeät – pysy kotona.
• Älä tehe tarpheettomia reisuja.
  Sie joka olet Västerbottenissa et piä tehhä tarpheettomia reisuja läänissä eli rekiuunin ulkopuolela. Jos sie häyt reisata, tehe se niin tartuntavarmala tavala kun maholista. Ole tarkka ette sie saatat päästä kotia varmala tavala jos sie saisit symtoomia.
• Käytä suusuojaa kolektiiviliikentheessä.
  Jos sie olet syntyny 2004 eli aiemin sie piät aina käyttää kolektiiviliikentheessä kertakäytön suusuojaa. Se koskee vuorokauven kaikki aijat ja niin pitkhään kun on laaja levike Västerbottenissa.
• Käytä kertakäytön suusuojaa sisämiljöössä.
  Jos sie et saata välttää läheisiä kontaktia muitten kans ja kohtaat henkilöitä jokka on ulkopuolela sinun lähimäisten porukkaa sie piät käyttää suusuojaa. Mutta suusuoja ei korvaa sääntöä ette pittää välttää läheisiä kontaktia ja ette pittää distansia kaikissa tilantheissa missä se mennee. Esikoulussa, perus- ja jymnaasiekoulussa jällaa jatkossaki ette suusuojaa kehotethaan vain niissä erikoisissa tilantheissa missä raahvaat ei saata pittää distansia.

Muista ette kans jatkaa seurata kansalisia kehotuksia (på svenska).

Kaikki lapset yhessä taloperheessä pitävät pysyä kotona jos huoltaja eli sisko oottaa koevastausta covid-19:sta.  Se koskee lapsia esikoulusta jymnaasihaan. Se koskee kans nuorempia lapsia joila on symtoomia joita ei testata ja pere on ollu kontaktissa jonku kans jolla on eppäilty covid-19.

Kunnan jymnaasiekoulut kehotethaan jatkaa säänölistä dialookia tartuntasuojayksikön kans ja ette ottaa päätöksiä etä- ja distansikoulutuksesta paikalisen tartunanleviämisen pohjalta.

Muista kans jatkaa seuraamhaan kansalisia kehotuksia (på svenska).