OMAHOITO LAPSI

Vattatauti pienilä lapsila – mitäs sen saattaa tehhä itte?

Magsjuka hos små barn - vad kan man göra själv? - tornedalsfinska

Vaivat tulevat kätevästi

Kun lapset on vattatauvissa se on tavalista ette net oksentavat ja on tiareeta. Niilä saattaa kans olla vatta kipeä ja feeperiä. Vattatauti riippuu useasti infeksjuunista joka on tullu viiryksestä. Pienilä lapsila meinathaan tässä tekstissä sellaiset jokka on korkeinthaan viis-kuus vuotta.

Vaivat pruukaavat alkaa pari päivää jälkhiin kun lapsi on smitaattu, eli saanu tartunan, ja se tullee kätevästi. Useasti moni perheessä eli esikoulussa tulevat kipeäks. Tavalisesti infeksjuuni mennee yli muutamassa päivässä. Oksentamiset pruukaavat loppua vuorokauen sisälä, mutta tiareet saattavat kestää viikon.

Lapset on herkemät nestehävihöön

Sitä menettää nestettä ja suolaa oksentamisesta ja tiareesta. Pienet lapset on hyvin paljon herkempiä kun raahvaat nestheen menetyksestä. Jos pieni lapsi menettää enemän nestettä kun se saapi ruuhmiisheen se saattaa kätevästi tulla kehnomaks. Korkea feeperi tekkee ette lapsi menettää vielä enemän nestettä. Sen takia on tärkeä ette antaa juomaa aina alusta asti infeksjuunin aikana. Nuoriimat lapset on ekstra herkkiä nestheenpuutheele.

Jos lasta imetethään eli juotethaan pullola

Jos lasta imetethään sitä pittää jatkaa. Sitä pittää imettää useamin kun tavalisesti. Vaikka lapsi jatkaa oksentamista sitä pittää jatkaa imettämistä useasti. Sama koskee lasta jota syötethään pullola. Jos lapsi ei halua imeä sitä saattaa pruuvata ette pumpata ulos maijon ja antaa lusikala sitä. Sitä saattaa lypsää rintaa käsin eli pumpula. Sopivia pumppuja saattaa ostaa aputeekista.

Jos lapsela on suuret tiareet se ei riitä ette lapsi saapi rintamaitoa, lapsi tarttee sillon saa kans nestheenkorvausta.

Nestheenkorvaus

Jos lapsi oksentaa paljon sillon nestekorvaus on sitä parasta. Nestekorvaus lapsile on myytävänä aputeekissa. Koska nestheessä on suolaa niin ruuhmiin nestebalansi tullee takashiin hyvälä tavala.

Jos lapsi oksentaa paljon tarvithaan antaa suunile kaks teelusikkaa nestettä joka viies minuutti. Vuorokauen aikana tarttee enemän nestettä kun sitä uskoo, esimerkiks saattaa ykvuotias tarvita rapea litran.

Välistä lapsela saattaa olla helpompi saa muun sortin juomaa. Sillon saattaa yrittää sen kans, koska se on tärkeämpi kun mikhään muu ette lapsi saapi nestettä. Sitä pittää kyllä välttää liian sokerisia juomia, kun esimerkiks läski eli safti, koska liian paljon sokkeria saattaa antaa paheman tiareen. Ei myöskhään antaa lightjuomia koska net ei sisälä yhtään sokkeria.

Kun oksenukset on menheet yli mutta tiaree on jäljelä

Se on tavalista ette oksenuket loppuvat ensin ja tiaree saattaa jatkua vähän aikaa lissää. Jos lapsela on tiaree ja jos lasta imetethään sitä jatkaa imettämistä kun aiemin. Jos lasta ei imetetä, sitä saattaa antaa äitimaijonkorvausta, riisi- eli maisivelliä, riippuen lasten iästä. Alottakaa antamalla pieniä määriä kerrala ja sillä tavala kattoa ette lapsi säilyttää ruoan.

Kun lapsi haluaa alkaa syöhmään se on hyvä ette antaa tavalista ruokaa ja sekottaa lisärasuaa. Jos haluaa pruuvata jotaki joka seisottaaa vattaa sitä saattaa antaa lapsile, jokka on yli kuus kuukautta muuruuttisoppaa, tehty muuruttipyreestä ja veestä. Ajatelkaa ette frykti eli hetelmä antaa ulostusta joka on löysää ja vaikeamassa tiareessa pittää välttää täysjyvävelliä. Oottakaa fiiperirikhaan ruoan kans ette lapsi on tullu täysin terhveeks.

Jos oksenukset tulevat takashiin

Jos oksenukset tulevat takashiin, antakaa uuesti nestekorvausta, mutta olkaa huomaavia jos lapsi tullee laiskaks eli vaikuttaa kummaliselta.

Kuinkas saattaa estää smittaa eli tartuntaa?

Koska vattatauti on erittäin tartuttava se on hyvä jos lapsi ja kaikin muut perheessä pesevät nestesaipuala käet ennen syöntiä ja jälkhiin tualetin käynin ja ette kaikila on oma hantuuki eli käyttävät paperihantuukia jonka aina viskathaan jälkhiin käytön. Sitä saattaa kans useasti pyhkiä tualettia.

Jos lapsela on plöijat eli vaipat se on hyvä ette panna käytetyt plöijat plastipushiin ennen ku net viskathaan suuppatynnyrhiin. Jälkhiin käyttöä puhista hoitopöyän ja pese tarkoin käet jälkhiin plöijanvaihton.

Lapsi pittää olla kotona kun se oksentaa eli on tiaree. Jos lapsi käypi esikoulussa eli perheetaakiksessa se saattaa mennä takashiin sinne kun se ei ole oksentanu eli ollu tiareeta kahteen vuorokautheen.

Sitä saattaa tarvita kontaktata hoitoa

Sitä pittää hakea hoitoa hoitosentraalissa eli akyyttivasthaanotossa varsin jos lapsela on taahjaan tiareetä ja oksenusta ja näyttää merkkiä ette on nestheenpuute, siis on huomattavan väsynheenä ja ei ole kiinostunu ympäristöstä, pissaa vähän ja ei jaksa eli harvoin leikkii. Sitä pittää kans hakea hoitoa suorhaan jos lapsela paitti oksenus ja tiaree on korkea feeperi eli hyvin kipeä vatta, eli jos tiaree on sekotettu veren eli slemmin kans.

Sitä pittää soittaa siukkahoijonneuvonthaan eli ottaa yhteyttä hoitosentraalhiin jos lapsi ei ole tullu paremaks vuorokauen sisäle, eli jos lapsi vattatauvin jälkhiin on pirteä ja halukas mutta on ollu löysi vatta enemän kun kaks viikkoa.

Jos lapsi, joka on alle kuus kuukautta, saapi oksenusta ja tiareeta sitä pittää aina kontaktata siukkahoijoneuvonan eli hoitosentraalin.

Jos lapsi on saanu tiareen ulkomaanmatkan yhteyvessä sitä pittää kontaktata hoitosentraalin eli lastenlääkärivasthaanoton.

To the top of the page