Vaksinasuuni covid-19 vasten

Kaikile henkilöile, jokka oon täyttänheet 12 vuotta tarjothaan vaksinasuuni. Jokku lapset yli 5 vuotta vanhaat saattavat kansa saaja vaksiinin covid-19 vasten.

Sulle, joka haet asyliäki elikkä luatta olet Ruottissa tarjothaan ilhmainen vaksinasuuni. Tämä jällaa sinuaki joka opiskelet elikkä olet töissä Ruottissa ilman ette olla ruottalainen kansalainen.

Sinua rekomenteerathaan ottamhaan vaksiini vaikka sulla oon ollu covid-19.

Sie saat vaksiinin pruutala käsivartheen. Sie joka olet 18 vuotta elikkä vanheempi saat kolme elikkä neljä pruutaa. Sie joka olet nuorempi ko 18 vuotta saat kaks pruutaa. Sie saat pruutat eri kertoina.

Ota kaikki pruutat jokka tarjothaan sulle. Silloin sie saat hyvän suojan covid-19 vasten.

Sie saat jääjä 15 minuttia jälkhiin ko sie olet saanu sinun pruutan. Se oon ette nähhä ette sie voit hyvin.

Sie saatat tarvita usean vaksiiniannoksen jos sulla oon kauhean heikkeintynny imynisuoja. Sinun lääkäri päättää jos sie tarttet sen.

Sie et saata valikoittea minkä vaksiinin sie saat.

Kysy hoitohenkilökunnalta jos sulla oon hunteerinkiä sinun vaksinasuunista.

Sie et piä ottaa vaksiinia jos sulla oon kuume elikkä  jos sie tunnet ette sie olet sairas. Oota ette sie voit hyvin taas.

Sie saatat tuntea kipua käsivarressa, päänsärkyä ja sie saatat olla väsyny ensimäisenä vuorokautena vaksinasuunin jälkhiin. Sulla saattaa kansa tulla vilu, kuume elikkä särky jäsehniin ja lihakshiin. Niitä kuttuthaan sivuvaikutuksiksi ja oon tavalisia lapsila ja täysilä jokka oon saahneet vaksiinin.

Sivuvaikutukset pruukaavat olla lievät ja kaota jonku päivän päästä.

Harvinhaisia sivuvaikutuksia vaksinasuunista

Monta miljoonaa ihmistä oon vaksineerattu covid-19 vasten. Se oon kauhean epätavalista ette saaja vakavia sivuvaikutuksia vaksiinin jälkhiin. Se oon paljon suurempi riski tulla vakavasti saihraaksi covid-19:ista.

Sie saatat ilmottaa Lääkelaitosvirastolle jos sie eppäilet ette vaksiini oon antanu joitaki sivuvaikutuksia. Tämä sivu oon ruottiksi.

Hoitohenkilökuntaki ilmottaa jos net eppäilevät ette vaksiini oon antanu sivuvaikutuksia.

Informasuunia eppäiltyista sivuvaikutuksista koothaan. Sitten tutkithaan jos niilä oon yhtheyttä vaksiinin kansa.

Sie joka olet raskhaana saatat tulla kauhean saihraaksi covid-19:ista. Ette suojata sinua ja lasta sulle rekomenteerathaan vaksinasuuni. 

Monet raskhaanaolevat mailmassa oon saahneet vaksiinin covid-19 vasten. Se ei ole vaaralista lapsele joka oon vattassa.

Puhuttele sinun paarmuskaa/kätilöä jos sulla oon kysymyksiä.

Lue lissää raskaanaolemisesta ja covid-19

Lapset saattavat tulla vakavasti saihraaksi covid-19:ista, vaikka se oon epätavalista. Lapsile, jokka oon 12 vuotta ja vanheemat, tarjothaan sen takia vaksiini.

Jokku lapset 5 vuen ikäsestä saattavat kansa saaja covid-19 vaksiinin. Tämä jällaa jos lapsela oon vakava saihraus. Se saattaa esimerkiksi olla vaikea keukkosaihraus. Puhuttele lääkäriä joka hoitaa lasta mikä jällaa.  

Henkilöt jokka oon nuoremat ko 18 vuotta saattavat tarvita hyväksymisen huoltajalta ette saaja vaksiinin. Ota yhtheyttä jonku kansa sielä missä vaksinasuunia annethaan jos sulla ei ole hyväksymistä ja halvaat ottaa vaksiinin.

Puhuttele lääkäriä jos sie ennen olet saanu vakavan alerkisen reaksuunin jostako sie tarttit hakea hoitoa samana päivänä. Se saattaa olla vaksinasuunista, lääkheestä elikkä jostaki mitä sie olit syöny.

Vaksiinia covid-19 vasten oon tarkistettu samala huolelisella laila ko muita vaksiinia. Miljoonia täysiä ja lapsia oon saahneet vaksiinin ja tutkiat oon tutkinheet vaikutuksia. Vaksiinia jatkethaan tutkimhaan.

Sivula Så fungerar vaccin sie saatat lukea ja kattoa filmiä vaksiinista. Sivu oon ruottiksi.

Sie saatat saaja covid-19 vaikka sinua oon vaksineerattu. Mutta enniimät jokka oon vaksineerattu ei tule vakavasti saihraiksi.